Bu ölkədə məhkumlar həbsxanada qalmaq üçün pul ödəyəcəklər

Fransanın ədliyyə naziri məhbuslardan həbsxanada qalmalarına görə pul tələb etmək niyyətində olduğunu açıqlayıb.

Lent.az xarici mediaya istinadla bildirir ki, aprelin 28-də Fransanın ədliyyə naziri Gerald Darmanin həbsxana rəsmilərinə məktub yazıb ki, məhbusların həbsxanada qalma xərclərinə dəstək olmaları üçün qanuna dəyişiklik edəcək. Onun sözlərinə görə, bu, həbsxana işçilərinin iş şəraitini yaxşılaşdıracaq. Xüsusilə, mühafizəçilərdən söhbət gedir.

"2003-cü ilə qədər məhbuslar həbsxana xərclərini özləri ödəyirdilər. Xəstəxanalar üçün sabit rüsum olduğu kimi, həbsxanada qalmaq üçün də sabit rüsum var idi", - nazir izah edib.

Beləliklə, o, məhbusların saxlanması ilə bağlı bu xərcləri ödəmək niyyətindədir. Nazirin sözlərinə görə, Fransa həbsxanalarının saxlanması xərcləri gündə 10 milyon avro, ildə isə demək olar ki, 4 milyard avro təşkil edir.

Qanun layihəsinə Fransa Milli Assambleyası yaxın vaxtlarda baxmalıdır.