İki ildir yuxusuz qalan adam nələr danışdı? - Hətta "narkoz"da da yatmır

Böyük Britaniyada Oliver Alvis “Daily Mail”ə müsahibəsində artıq iki ildir ki, həyatını zəhərləyən yuxusuzluqdan əziyyət çəkdiyini bildirib.

Lent.az xarici mediaya istinadla bildirir ki, 32 yaşlı kişinin sözlərinə görə, o, 2023-cü ilin dekabrında işdən evə qayıtdıqdan sonra bir daha yata bilməyib. O vaxtdan bəri yuxusunu qaytarmaq ümidi ilə çoxsaylı həkimlərə və alternativ təbabət mütəxəssislərinə müraciət edib, lakin heç kim ona kömək edə bilməyib. Alvisin sözlərinə görə, o, hətta anesteziya altında belə yata bilmir.

“Beynim sanki heç vaxt sönməyən fövqəladə vəziyyət rejimində ilişib qalıb”, — deyə o bildirib.

Alvis etiraf edib ki, istənilən şəraitdə yata bilən evsizlərə həsəd aparır. O, həyatını əzab adlandıraraq belə deyib: “Bu, yavaş-yavaş ölümdür — oyaq, istirahətsiz, yalnız ağrı və yatmağın ümumiyyətlə baş verə biləcəyinə inamsızlıq”.

Alvis daim başında təzyiq hiss etdiyini, oynaqlarının, sümüklərinin və əzələlərinin ağrıdığını deyib. Onun sözlərinə görə, elə bil gözləri yerindən çıxır. Bu səbəbdən kişi işindən ayrılmalı, evini satmalı və anasının yanına köçməli olub. Anası bu dəyişikliyə çox kədərlənib, çünki vaxtilə oğlu çox fəal və iddialı bir gənc olub. “Mən əvvəlki insanımın kölgəsiyəm”, - deyə Alvis gileylənib.

Həkimlər Alvisin vəziyyətini izah edə bilmirlər. Güman edilir ki, o, paradoksal yuxusuzluqdan əziyyət çəkir. Bu zaman insan əmin olur ki, o, heç yatmır, halbuki əslində müəyyən qədər yuxu alır. Bu tip yuxusuzluq müxtəlif psixi pozuntularla əlaqəli ola bilər.