Meşə yanğınının söndürülməsi zamanı iki helikopter toqquşdu-VİDEO

Bu gün günorta saatlarında Yunanıstanda meşə yanğınının söndürülməsi zamanı iki helikopter toqquşub.

Lent.az “Naftemporiki” nəşrinə istinadən xəbər verir ki, Psatxa yaşayış məntəqəsi yaxınlığında meşə yanğınının söndürülməsi əməliyyatı zamanı toqquşan iki yanğınsöndürmə helikopteri dərəyə düşüb.

Toqquşmadan sonra helikopterlərdən biri dispetçer mərkəzi ilə əlaqəni itirib. Bundan sonra xilasetmə xidmətləri dərhal bütün mümkün rabitə kanalları vasitəsilə ekipajlarla əlaqə yaratmağa çalışıblar. Bir müddət sonra helikopterlərdən birinin pilotu əlaqə saxlayaraq təhlükəsiz vəziyyətdə olduğunu bildirib. Pilotun həmkarı müxtəlif xəsarətlər alsa da, sağ qalıb.

İkinci helikopterin ekipajının taleyi barədə isə hələlik heç bir məlumat yoxdur. Axtarış-xilasetmə əməliyyatı davam edir. Hadisə yerinə əlavə xilasedicilər və tibb briqadaları göndərilib. Ərazinin mürəkkəb relyefi və tüstülənmə xilasedicilərin işini çətinləşdirsə də, onlar qəza yerinə mümkün qədər tez çatmağa çalışırlar.

Yunanıstan hakimiyyəti hadisənin səbəbləri ilə bağlı hələlik rəsmi açıqlama verməyib. Yanğının söndürülməsi aparılan ərazidə güclü külək müşahidə olunub ki, bu da aviasiya əməliyyatları zamanı risk yaradan əsas amillərdən hesab edilir.

Xilasetmə əməliyyatı başa çatdıqdan sonra hadisə ilə bağlı araşdırmaya başlanılacaq.