Açarları sirkə ilə niyə təmizləyirlər? - Hamısına uyğun deyil

Hər gün istifadə etdiyimiz açarların üzərində əl yağı, toz və parça lifləri toplanır. Zamanla bu çirklər açarın yivlərində yapışqan təbəqə yaradır və istifadə zamanı kilidin içərisinə keçə bilir.

Lent.az xarici mediaya istinadla xəbər verir ki, adi metal açarların təmizlənməsi üçün ağ sirkədən istifadə üsulu var, lakin bu üsul elektron açarlara və bütün metal örtüklərə uyğun deyil.

Sirkə nə üçün istifadə olunur?

Sirkənin tərkibindəki turşu bəzi səthi çöküntülərin və yüngül pas izlərinin yumşalmasına kömək edə bilər. Bununla belə, onu bütün çirkləri təmizləyən və ya kiliddəki nasazlığı aradan qaldıran vasitə hesab etmək olmaz.

Nəşrdə adi metal açarı sirkə ilə azca nəmləndirilmiş parça ilə silmək, bir neçə dəqiqədən sonra yivlərini yumşaq diş fırçası ilə təmizləmək tövsiyə olunur. Ardınca açar su ilə yaxalanmalı və tam qurudulmalıdır.

Açarı sirkədə uzun müddət saxlamayın

Metal açarı sirkənin içərisində uzun müddət saxlamaq səthin tutqunlaşmasına və qoruyucu örtüyün zədələnməsinə səbəb ola bilər. Buna görə materialı və örtüyü məlum olmayan açarlarda bu üsula ehtiyatla yanaşmaq lazımdır.

Təmizlik zamanı açarın vəziyyətinə də baxmaq faydalıdır. Əyilmə, çat və ya dişlərdə ciddi aşınma varsa, açarı ustaya göstərmək məsləhətdir. Zədələnmiş açar kilidin içərisində qırıla bilər.

Elektron açarları islatmaq olmaz

Avtomobil pultları, çipli və ağıllı açarlar suya və sirkəyə salınmamalıdır. Maye elektron hissələrə daxil olaraq onları sıradan çıxara bilər.

Belə açarların təmizlənməsində istehsalçının qulluq qaydalarına əməl edilməli, elektron korpusa maye düşməməlidir.

Sirkə dezinfeksiya vasitəsini əvəz etmir

Sirkə ilə təmizləmə açarın bütün mikroblardan təmizləndiyi demək deyil. Əşyanın dezinfeksiyası tələb olunursa, onun materialına uyğun, bu məqsəd üçün nəzərdə tutulmuş vasitə seçilməlidir.

Kilid ilişirsə, içinə sirkə tökməyin

Təmiz açarla da kilid çətin açılırsa, problem mexanizmin özündə ola bilər. Sirkəni birbaşa açar yuvasına tökmək və ya püskürtmək düzgün deyil.

Belə hallarda kilid istehsalçısının tövsiyə etdiyi xüsusi qulluq vasitəsindən istifadə etmək, problem davam edərsə, ustaya müraciət etmək lazımdır.