Bakıda iki qardaş taksi sürücüsünün başına oyun açdı

Noyabrın 22-də Bakı şəhərinin Nəsimi rayonu ərazisində quldurluq hadisəsi baş verib. Lent.az-ın Daxili İşlər Nazirliyinin mətbuat xidmətinə istinadən verdiyi məlumata görə, Bakı şəhər sakini Elməddin Quliyevin "Daewoo" markalı avtomaşınına sərnişin qismində oturmuş 2 naməlum şəxs küt alətlə ona baş nahiyəsindən xəsarət yetirib. Həmin şəxslər sürücünün 80 manat pulunu alıb qaçıblar.

Nəsimi RPİ 22-ci PB əməkdaşlarının həyata keçirdikləri əməliyyat-axtarış tədbirləri nəticəsində hadisəni törətmiş, şəhər sakinləri, əvvəllər məhkum olunmuşlar Tural Bacanov və onun qardaşı Tərlan tutulublar. Turaldan 1,7 qram, Tərlandan isə 1,6 qram heroin götürülüb. Araşdırmalar zamanı noyabrın 16-da Tofiqə Qasımova qarşı quldurluğun Tərlan və Tural Bacanov qardaşları tərəfindən törədilməsi də müəyyən edilib.

Araşdırmalar davam etdirilir.

Nizam RZA