Elçibəyin keçmiş mühafizəçisi Türkiyədə silah və narkotiklə tutuldu

Onun evində axtarış aparan polis qardaşını da həbs edib

İstanbulun Beykoz rayonunda aparılan axtarış aparan polis 3 ədəd qumbara, “Kalaşnikov” avtomatı və çoxlu sayda güllə tapıb. Lent.az-ın Türkiyə mətbuatına istinadən məlumatına görə, tapılan silah-sursatın hərbçi olarkən Azərbaycanın keçmiş prezidenti Əbülfəz Elçibəyin mühafizəçisi olmuş İ.Ç.-yə məxsus olduğu üzə çıxıb.

Məlumata görə, polislər bundan öncə asayişin yoxlanması bir avtomobildə narkotik tutublar. Sürücünün ifadəsi əsasında Tokatköy qəsəbəsinin Çiftlik prospektində İ.Ç. və qardaşı A.Ç.-nin evində axtarış aparıb və sözügedən silah-sursatı aşkar edib. Avtomobildə narkotiklə yaxalanan iki nəfər, həmçinin İ.Ç. və A.Ç. həbs edilib.

Tutulanların böyük qardaşı M.Ç. qardaşlarının narkotiklə əlaqəsinin olmadığını söyləyib: “Qardaşım təxminən 20 il əvvəl ehtiyatda olan zabit kimi hərbi xidmət keçərkən rəsmi tapşırıqla Azərbaycana getmiş və orada Əbülfəz Elçibəyin mühafizəçisi olmuşdu. Qumbaraları da xatirə olaraq özü ilə gətirmişdi”.