Hava limanından yüz minlərlə avro və külli miqdarda qızıl-zinət əşyaları oğurlayan şəxs tutulub

Hüquq-mühafizə orqanlarından APA-ya verilən məlumata görə, Böyük Britaniyanın BMİ şirkətində (“British Airways” şirkətinin regional bölməsi) supervayzer işləyən Müzəffər Ələsgərov təyyarələrin yük yerlərindən oğurluq edib. O, təyyarələrin yük yerlərindən ayrı-ayrı vaxtlarda Azərbaycan vətəndaşlarına və əcnəbilərə məxsus yüklərdən yüz minlərlə avro və külli miqdarda qızıl-zinət əşyaları oğurlayıb.

Hüquq-mühafizə orqanları əməkdaşlarının keçirdikləri əməliyyat axtarış tədbirləri nəticəsində Müzəffər Ələsgərov yaxalanıb. Onun barəsində Cinayət Məcəlləsinin 177.1-ci (oğurluq, yəni özgənin əmlakını gizli olaraq talama), 177.2.2-ci (təkrar törədildikdə) və 177.3.2-ci (oğurluq külli miqdarda törədildikdə) maddəsi ilə cinayət işi açılıb.

Cinayət işi üzrə xeyli sayda zərərçəkmiş var. Onların arasında Azərbaycan və xarici ölkələrdən olan vəzifəli şəxslər də var.

Faktla bağlı başlanan cinayət işinin ibtidai istintaqı yekunlaşıb. İş baxılması üçün Ağır Cinayətlərə Dair İşlər üzrə Məhkəməyə göndərilib.

“Azərbaycan Hava Yolları” (AZAL) QSC-nin xidmət rəisi Məhərrəm Səfərli APA-ya açıqlamasında bu hadisənin AZAL-a heç bir aidiyyəti olmadığını, şirkətin sistemində Müzəffər Ələsgərov adlı şəxsin çalışmadığını bildirib.