3 avtomobil toqquşdu: 1 ölü, 3 yaralı

Abşeron Rayon Polis İdarəsindən APA-ya verilən məlumata görə, qəza sentyabrın 26-sı saat 19:45 radələrində Fatmayı qəsəbəsi ərazisində qeydə alınıb. Ağstafa rayonu Göycəli kənd sakini, 1984-cü il təvəllüdlü İbrahimov Şahin Abbas oğlunun idarə etdiyi “Mercedes” markalı, 90 CL 779 dövlət nömrə nişanlı, Abşeron rayonu, Fatmayı qəsəbə sakini, 1966-cı il təvəllüdlü Zeynalov Gündüz Şirzad oğlunun idarə etdiyi “Nissan Maxima” markalı, 10 AA 357 dövlət nömrə nişanlı və Goranboy rayonu Xan Qərvənd kənd sakini, 1986-cı il təvəllüdlü Mirzəyev Vüqar Zeynalabdin oğlunun idarə etdiyi “Mercedes” markalı, 90 BD 716 dövlət qeydiyyat nişanlı avtomobillər toqquşub.

Nəticədə Şahin İbrahimovun idarə etdiyi “Mercedes” markalı, 90 CL 779 dövlət nömrə nişanlı avtomobildə olan sərnişin, Ağstafa rayonu Göycəli kənd sakini, 1989-cu il təvəllüdlü Axundov Elvin Ədalət oğlu ölüb, Şahin İbrahimov, Gündüz Zeynalov və onun sərnişini, Fatmayı kənd sakini, 1978-ci il təvəllüdlü Cavadov Faiq Akif oğlu müxtəlif dərəcəli bədən xəsarətləri alıblar.

Faktla bağlı Abşeron RPŞ-də Cinayət Məcəlləsinin 263.2-ci maddəsi ilə cinayət işi başlanıb, araşdırma aparılır.