İstintaq davam edir...

Jurnalist Elmar Hüseynovun qətlinin istintaqı nə yerdədir? “Media forum” saytı bu sualla Milli Təhlükəsizlik Nazirliyinin ictimai əlaqələr mərkəzinin rəhbəri Arif Babayevə müraciət edib.

Arif Babayevin cavabı belə olub: “Elmar Hüseynovun qətli ilə bağlı açılan cinayət işi üzrə intensiv əməliyyat-istintaq hərəkətləri davam etdirilir, şahidlər dindirilir, baxış keçirilir”.

Elmar Hüseynov 2005-ci il martın 2-də Bakıda, yaşadığı evin blokunda odlu silahla qətlə yetirilib. İstintaq işini Milli Təhlükəsizlik Nazirliyi araşdırır. Azərbaycanın hüquq mühafizə orqanları qətldə şübhəli bilinən şəxslərdən ikisinin adını açıqlayıb: Gürcüstan vətəndaşları Teymuraz Əliyev və Tahir Xubanov. İndiyədək onlar tapılmayıb.

1967-ci il iyulun 17-də Bakıda anadan olan Elmar Hüseynov jurnalistikaya 1990-cı illərin əvvəllərində gəlib. Bir neçə rusdilli media quruluşunda çalışan jurnalist daha sonra “Monitor” jurnalını təsis edib.