Daha bir azərbaycanlı ziyalı həbs olunub

Güney Azərbaycanda tanınmış azərbaycanlı ziyalı, ictimai fəal həbs edilib.

Lent.az-ın məlumatına görə, ETTELAAT əməkdaşları Behbud Quluzadəni fevralın 16-da yerli vaxtla saat 12 radələrində Qoşaçay (Miyandoab) şəhərində tutaraq naməlum istiqamətdə aparılıb. Məlumatda ETTELAAT əməkdaşlarının azərbaycanlı fəalın evində axtarış apardığı, ona məxsus kompüter və bir sıra şəxsi əşyaları özləri ilə götürdüyü bildirilir. B.Quluzadənin hahzırda saxlanıldığı yer barədə məlumat yoxdur.

Qeyd edək ki, B.Quluzadə 2010-cu ilin mayında 17 nəfər azərbaycanlı fəalla birlikdə həbs olunub və 8 ay ağır işgəncələrə məruz qaldıqdan sonra 250 min dollar mülk girovu qarşılığında müvəqqəti azadlığa buraxılıb. B.Quluzadə 2006-cı ilin mayında da «İran» qəzetində azərbaycanlıları təhqir edən karikaturanın dərcindən sonra keçirilmiş etiraz aksiyaları zamanı həbs edilərək bir neçə ay ETTELAAT-ın təcridxanasında saxlanılıb.