“Beşiktaş” şokda!

Mehmet Topuz “Fənərbağça” ilə müqavilə bağladı

Türkiyənin “Fənərbağça” klubu mövsümlərarası dövrdə ilk futbolçu transferini reallaşdırıb. Lent.az-ın “Habertürk”ə istinadən verdiyi məlumata görə, “sarı-lacivərdlilər” “Kayserispor”un yarımmüdafiəçisi Mehmet Topuzla 3 illik müqavilə bağlayıb.

26 yaşlı futbolçu əvvəlcədən “Beşiktaş”la anlaşdığını açıqlasa da, “Fənər” rəhbərliyinin apardığı gizli danışıqlar nəticəsində o, fikrini dəyişdirib. Kayseridən klub prezidenti Əziz Yıldırımın şəxsi təyyarəsi ilə İstanbula gətirilən Topuz iyunun 15-də rəsmi müqaviləyə imza atacaq.

Bu arada “Beşiktaş” klubu daha bir şok xəbəri Nihat Kahveçidən alıb. “Qartallar” özünün yetişdirdiyi Kahveçini İspaniyanın “Vilyarreal” komandasından geri qaytarmaq istəyiblər. Hətta Türkiyə klubu bu hücumçudan ötrü İspaniya təmsilçisinə 5,5 milyon avro ödəməyə razılıq verib. Lakin Nihat karyerasını İspaniyada davam etdirmək istədiyini bildirərək, “Beşiktaş”ın prezidenti Yıldırım Dəmirörənə “yox” cavabı verib.