Bakıda torpaq ucuzlaşır

İlin əvvəli ilə müqayisədə iyulda torpaq bazarında qiymətlərin 26,9 faiz azalması qeydə alınıb

Bakının torpaq bazarındakı ucuzlaşma meylləri iyul ayı ərzində də davam edib. Belə ki, ötən ay paytaxtda torpağın orta qiyməti 0,3 faiz azalıb.

“MBA konsaltinq” şirkətinin rəhbəri Nüsrət İbrahimov Lent.az-a bildirib ki, iyun ayında Bakı şəhəri üzrə 1 sot torpağın orta qiyməti 17 min 936 dollar təşkil edib. Onun sözlərinə görə, ilin əvvəli ilə müqayisədə Bakının torpaq bazarında 26,9 faiz azalma qeydə alınıb.

Kommersiya məqsədli əmlak bazarında isə qiymətlər 0,7 faiz artıb. Nüsrət İbrahimov deyir ki, ötən ay belə obyektlərin 1 kvadratmetrinin qiyməti 3340 dollar olub. Onun sözlərinə görə, belə obyektlərdə ən çox artım zirzəmilərdə qeydə alınıb – 3,1 faiz. Ofis sahələrində isə qiymətlər dəyişməyib.

Elxan SALAHOV