Barəsindəki şayiələri İlhamə cavablayıb

Azərbaycanın və Dağıstanın xalq artisti, Şöhrət ordenli, İlhamə Quliyeva «ömrünün son günlərini yaşaması» ilə xəbər yayanlara ismarıc göndərib: «Mənim öləcəyimi deyənlərə, yazanlara ismarıcım var. Bildirmək istəyirəm ki, bu ömrü mənə Allah-Təala bəxş edib. Özü məni bu dünyaya bəxş edib, özü də zamanı gələndə dünyadan aparacaq. Mən heç bir şeydən qorxmadığım kimi ölümdən də qorxmuram. Əgər mən bu dünyanı tərk edərəmsə, şərəfli tərk edərəm.

Bilirəm ki, ölümümdən sonra da ürəklərdə yaşayacağam və hörmətlə anılacağam. Mənim pis günümü, ölümümü arzulayanlar bilsinlər ki, mənim kimi insanlar dövlətinə, Vətəninə, dövlət başçısına sadiq olur. Ölümümü gözləyən çarəsizlər bilsin ki, xoşbəxt həyatım, xalqıma sədaqətli vətəndaş olmağımla varam, yaşayıram. Bir də ki, ay yazıq, bu bəd xəbəri yayan, hələ bilmək olmaz, kim-kimdən əvvəl bu dünyanı tərk edəcək. Hələ qarşıda Vətənim Azərbaycan üçün görəcəyim böyük, yararlı işlərim var.

Ömrümün son günlərini yaşamağımla bağlı xəbəri eşidəndə təəccüblənmədim. Çünki dəfələrlə zəif, həyatda heç bir uğura nail olmayan kəslər qısqanclıqdan haqqımda arzusunda olduqları bu şayiəni yayıblar. Çünki mən varam, yaşayıram və varlığımı həzm edə bilməyənlərə deyirəm: «Heç olmazsa həyatınızı elə yaşayın ki, bu dünyada iziniz qalsın». Mənim izim mədəniyyətimizdə, incəsənətimizdə, ürəklərdə, sizin isə arzunuz ürəyinizdə qalacaq».