Alimlərdən təəccübləndirən kəşf: Ulduzunun əksinə hərəkət edən planet aşkarlandı

Astronomlar ulduzunun fırlanma istiqamətinin əksinə hərəkət edən qeyri-adi planet aşkar ediblər.

Lent.az xəbər verir ki, GJ 3090 b adlanan planet kiçik Neptun ölçüsündədir və nisbətən kiçik, soyuq ulduzun ətrafında dövr edir. Alimlərin məlumatına görə, planetin orbiti retroqrad, yəni ulduzun fırlanmasının əks istiqamətindədir.

Alimlər bildirirlər ki, planetlərin adətən ulduzları ilə eyni istiqamətdə hərəkət etdiyi nəzərə alınsa, bu kəşf onların necə formalaşması ilə bağlı mövcud nəzəriyyələr üçün maraqlı suallar yaradır.

Tədqiqatçılar hesab edirlər ki, belə qeyri-adi orbit güclü qravitasiya təsirləri nəticəsində yarana bilər. Lakin GJ 3090 sistemində planetin orbitini bu istiqamətə dəyişə biləcək böyük bir cismin aşkar edilməməsi kəşfi daha da maraqlı edir.