Şəmkirdə IV-V əsrlərdə mövcud olmuş şəhər qalıqları aşkar edilib

AMEA Arxeologiya və Etnoqrafiya İnstitutunun əməkdaşlarının Şəmkir rayonunun Qaracəmirli kəndi ərazisində apardıqları arxeoloji tədqiqatlar zamanı eramızdan əvvəl IV-V əsrlərdə mövcud olmuş şəhər qalıqları aşkar edilib. Bu barədə Lent.az-a AMEA-nın mətbuat xidmətindən məlumat verilib.
Ekspedisiyanın rəhbəri, institutun şöbə müdiri, AMEA-nın müxbir üzvü, tarix elmləri doktoru, professor İlyas Babayev ərazidə ötən əsrin 80-ci illərində təsərrüfat işləri ilə əlaqədar təpə hamarlanarkən monolit daşdan yonulmuş sütun altlığının aşkar edildiyini bildirib: “Bu sütun altlıq 1958-ci ildə Qazax rayonunun Sarıtəpə adlı ərazisində aşkarlanmış 2 sütun altlığı ilə eyni tiplidir”.
Onun sözlərinə görə, 2006-cı ildən etibarən böyük saray qalıqlarının tədqiqi ilə məşğul olan Azərbaycan, Almaniya və Gürcüstan beynəlxalq arxeoloji ekspedisiyasının qədim inzibati abidə üzərində apardığı tədqiqatlar sarayın sütun altlıqları olduğunu göstərib.
Ötən il də həmin ərazidə eramızdan əvvəl IV-V əsrlərə aid saray qalıqları aşkar edilib. Binanın bünövrəsinin çınqıl daşdan, divarlarının isə o dövr üçün səciyyəvi olan çiy kərpicdən tikildiyi müəyyən olunub. Binanın Əhəmənilər imperiyasının Cənubi Qafqazdakı inzibati mərkəzində tikilmiş sarayın qalıqları olduğu, tikilinin Əhəməni imperiyası canişininin iqamətgahı olduğu güman edilir.
Arxeoloji qazıntılar davam etdirilir.
Pərvin ABBASOV