Elmi fantastika və həyəcan kino tarixində ən çılğın, ən möhtəşəm və ən yadda qalan filmləri yaradan birləşmədir. Bu janrda bütöv bir planet partladıla, havada zaman dayandırıla və Arnoldu Marsa göndərmək olar və bütün bunlar inanılmaz dərəcədə möhtəşəm görünər. Burada çənən yerə düşür, gözlər ekrana yapışır və gördüklərin heç vaxt yaddaşdan silinmir. Bu, nə sadə bir məsələdir, nə də hamının xoşuna gələn rahat bir tamaşa bu, saf kino adrenalini deməkdir.
Lent.az sizə həyəcan verəcək 10 filmi təqdim edir.
“Ulduz desantı” (1997)
Rejissor: Pol Verhoven
Bəşəriyyətin nəhəng böcəklərlə müharibə apardığı bir kainat o qədər zəhərli satira ilə təqdim olunur ki, hələ də aydın deyil: bu, militarizmin parodiyasıdır, yoxsa onun tərənnümü. Nəhəng desant gəmiləri, yaşıl qan çayları və uşaqlıqda filmi izləyən hər kəsin yaddaşına həkk olunmuş “beyin böcəyi”. 1997-ci ildən bəri kosmik döyüşlərin miqyası bu qədər təsirli şəkildə nadir hallarda göstərilib.
“Avatar” (2009)
Rejissor: Ceyms Kemeron
Tarixin ən çox gəlir gətirən filmi (və ikinci yeri tutan da yenə onun filmidir). İkranlarda uçuşlar, biolüminessent cəngəlliklərdə döyüşlər və finalda “mavi olanlar dəmirə qarşı” qarşıdurması. Bu film 3D texnologiyasının nəyə qadir olduğunu bütün dünyaya sübut etdi və IMAX formatında vizual bir inqilab yaratdı.
“Akira” (1988)
Rejissor: Katsuhiro Otomo
Siyahıdakı yeganə animasiya filmi və 90-cı illərdə Qərb tamaşaçısının beynini sözün əsl mənasında dağıdan əsər. Neon işıqlı Tokio-2019-da motosiklet təqibləri, psionik partlayışlar və bu gün belə tükləri biz-biz edən final. “Akira” göstərdi ki, anime istənilən Hollivud döyüş filmindən daha sərt ola bilər.
“Beşinci element” (1997)
Rejissor: Lüq Besson
Brüs Uillis, Milla Yovoviç, kosmik ölüm taciri rolunda Qari Oldman və maksimum sürətdə Kris Taker. 90-cı illərin ən stil sahibi və ən dəli elmi-fantastik filmi: uçan taksilər, mavi opera divası və məşhur “multipass”.
“Başlanğıc” (2010)
Rejissor: Kristofer Nolan
Əsas düşmənin fizika qanunları və insanın öz zehni olduğu bir döyüş filmi. Öz-özünə fırlanan dəhliz, çəkisizlikdə atışma və illərdir mübahisə doğuran final — toppaç düşdü, ya yox?
“Hər şeyi xatırla” (1990)
Rejissor: Pol Verhoven
Arnold Şvartsenegger Marsda, üçdöşlü mutant qadınlar, oksigen zavodları və məşhur replika: “Onu öldürün, o hər şeyi xatırladı”. 90-cı illərdə kompüter qrafikası yerinə əsasən praktik effektlərdən istifadə edən əsl klassika.
“Sabahın sərhədində” (2014)
Rejissor: Dağ Layman
Tom Kruz film ərzində təxminən 300 dəfə ölür və hər dəfə daha da güclənir. “Yaşa. Öl. Təkrarla.” — zaman döngəsi haqqında çəkilmiş ən yaxşı elmi-fantastik ekşen filmlərindən biri, burada hər ölüm həm qəhrəmana, həm də tamaşaçıya xeyir verir.
“Terminator 2: Qiyamət günü” (1991)
Rejissor: Ceyms Kemeron
Bu günə qədər “tarixin ən yaxşı davam filmi” adı uğrunda mübahisə edilən iki filmdən biri. Maye metal T-1000, bir əlində miniqan, digərində motosiklet və Los-Anceles kanalı boyunca unudulmaz təqib səhnəsi. Mütləq klassika.
“Matrix” (1999)
Rejissorlar: Vaçovski bacıları
Ekşen janrını həmişəlik dəyişən film. “Güllə zamanı”, qırmızı və mavi həb seçimi, güllələrdən yayınan Kianu Rivz və sadəcə irəli yeriyən Hüqo Uivinq. Stil və vizual baxımdan demək olar ki, zirvə nöqtəsi.
“Yadplanetlilər” (1986)
Rejissor: Ceyms Kemeron
Bəli, bu da davam filmidir. Və bir çoxları üçün orijinaldan da yaxşıdır. Siqurni Uiver M41A avtomatı ilə, kosmik dəniz piyadaları və kabuslara çevrilmiş ksenomorflar kraliçası. Ən gərgin, ən qapalı məkanlı və ən ideal elmi-fantastik ekşen filmi. “Ondan uzaq dur, ey əclaf!” — və zəmanətli tüklər biz-biz olur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
