Naringi və digər sitrus meyvələri adətən şirəli iç hissəsinə görə sevilir. Lakin təcrübəli evdar qadınlar naringi qabığını tullantı deyil, dəyərli məhsul hesab edirlər. İlk baxışda adi “zibil” kimi görünən bu qabıqlar əslində efir yağları, antioksidantlar və vitaminlərlə zəngin təbii mənbədir. Məhz bu zəngin tərkib sayəsində naringi qabığı hava təravətləndiricilərini, bəzi aptek vasitələrini və hətta bağ üçün xüsusi qoruyucu məhsulları əvəz edə bilir.
Lent.az bu barədə ətraflı məlumat verir.
Naringiin qabığı mətbəxdə
Naringi qabığı yeməklərə xüsusi aroma qataraq mətbəxinizin “gizli silahına” çevrilə bilər. Qabıq yaxşıca qurudulub qəhvəüyüdəndə üyüdülərsə, ətirli toz əldə olunur. Bu ədviyyat bişmiş məmulatlara, desertlərə, souslara və marinadlara fərqli dad verir.
Təzə və ya qurudulmuş qabıqdan bir neçə parça çay dəmləyən qaba əlavə edildikdə içki C vitamini ilə zənginləşir və sinir sistemini sakitləşdirməyə kömək edir. Şirədə bişirilib qurudulan naringi qabıqları faydalı və təbii şirniyyat hesab olunur.
Məişətdə naringi qabıqlarının istifadəsi
Sitrus qabıqlarından ev işlərində istifadə kimyəvi təmizləyici və süni ətirvericilərin miqdarını azaltmağa imkan verir. Ən təsirli üsullardan biri sirkə dəmləməsidir. Şüşə qabda naringi qabıqları adi sirkə ilə qarışdırılaraq güclü dezinfeksiyaedici məhlul əldə olunur. Bu qarışıq mətbəx səthlərindəki bakteriyaları məhv edir və köhnə yağ qatlarını asanlıqla təmizləyir.
Təzə qabığın ağ hissəsi metal əşyaların parladılması üçün uyğundur. Kranları və ya çəngəl-bıçaqları onunla sürtərək ərp və ləkələrdən xilas olmaq mümkündür.
Dolablarda naringi qabıqları ikiqat fayda verir. Onların qoxusu güvələr üçün təbii qoruyucudur. Xırdalanmış qabıqları düyü ilə birlikdə balaca kisəciklərə qoyduqda isə həm rütubəti özünə çəkir, həm də xoş ətir yaradır.
Ev bitkilərinin qorunması
Ev bitkiləri saxlayanlar üçün naringi qabığı tamamilə pulsuz və effektiv vasitədir. Qabıqdan hazırlanan dəmləmə hörümçək gənəsinə qarşı mübarizədə istifadə olunur. Bunun üçün qabıq suda saxlanılır və alınan məhlul bitkilərin yarpaqlarına püskürdülür.
Naringi qoxusu eyni zamanda pişikləri də uzaqlaşdırır. Əgər ev heyvanı güllərin yarpaqlarını dişləyirsə və ya torpağı eşələyirsə, qabıqları birbaşa dibinə qoymaq kifayətdir. Sitrus qoxusu heyvanları qorxudur və bitkilər zərər görmür.
Sağlamlıq və kosmetologiyada naringi qabığı
Naringi qabıqları vitaminlərlə zəngin olduğu və antiseptik xüsusiyyətlərə malik olduğu üçün ev apteki və kosmetik baxımda da istifadə olunur. Soyuqdəymə zamanı qurudulmuş qabıqdan hazırlanan dəmləmə öskürəyi yüngülləşdirir və bəlğəmin xaric olunmasına kömək edir. İki xörək qaşığı xırdalanmış qabıq üzərinə bir stəkan qaynar su tökmək kifayətdir.
Efir yağları həzm sisteminin fəaliyyətini stimullaşdırır, maddələr mübadiləsini aktivləşdirir və yeməklərin mədədə daha asan həzm olunmasına şərait yaradır. Sitrus efir yağları güclü sakitləşdirici təsirə malikdir. Gecə yataq yanında qoyulan təzə naringi qabıqları narahatlığı azaldır və yuxuya getməyi asanlaşdırır.
Üz dərisi üçün naringi buzları hazırlamaq mümkündür. Qabıq dəmləməsinin dondurulmuş kubikləri səhərlər istifadə edildikdə məsamələri daraldır və dərini canlandırır. Bədən üçün isə xırdalanmış quru qabıq dəniz duzu və bitki yağı ilə qarışdırılaraq təbii skrab hazırlanır. Bu qarışıq dərini dərin təmizləyir və sellülitlə mübarizədə köməkçi vasitə sayılır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
