Dövlət Statistika Komitəsində enerji balansının metodoloji əsaslarına dair seminar keçirilib

Bu gün Azərbaycan Dövlət Statistika Komitəsində “Enerji balansının tərtib edilməsinin metodoloji əsasları: nəzəriyyə və praktika” mövzusunda seminar keçirilib.

Lent.az-ın məlumatına görə, seminarda iştirak edən dövlət qurumlarının əməkdaşlarına enerji balansı, onun tərtib edilməsi, məlumatların toplanması və digər məsələlər barədə ətraflı məlumat verilib. Komitənin sənaye, nəqliyyat və rabitə statistikası şöbəsinin müdiri Yusif Yusifov “Rəsmi statistikada enerji statistikasının təşkili” mövzusunda məruzə ilə çıxış edib. O, enerji balansının tərtibatı üzrə işin təşkili barədə geniş təqdimat edib: “Biz enerji balansının hesablanması üçün yeni metodları ilə bağlı yeni kitab dərc etmişik. Bu kitabda həm köhnə hesablama üsulu, həm də indiki enerji istehsalçıları və istehlakçılardan toplanması üsulu öz əksini tapıb”.

Sonda “Enerji balansının tərtib olunmasının metodoloji əsasları: nəzəriyyə və praktika” mövzusunda təqdimatla Komitənin yanacaq-enerji və material balansları statistikası şöbəsi müdirinin müavini Rauf Qurbanov çıxış edib. R.Qurbanov öz çıxışında daha çox anlayışlar, balansın tərtibatının məqsədi, əsas prinsipləri, strukturu və digər nəzəri məsələlər barədə ətraflı məlumat verib.

Nailə