Daha bir sabiq icra başçısına HÖKM OXUNDU: Əmlakı müsadirə edildi

Biləsuvar rayonunun sabiq icra başçısı Mahir Quliyevin cinayət işi üzrə məhkəmə prosesi başa çatıb.

Lent.az APA-ya istinadən xəbər verir ki, Bakının Sabunçu rayon Məhkəməsinin inzibati binasında, Lənkəran Ağır Cinayətlər Məhkəməsinin hakimi Müşfiq Məmmədovun sədrlik etdiyi prosesdə vəkil Leyla Məmmədova müdafiə çıxışı edib.

Vəkil çıxışında məhkəmədən təqsirləndirilən şəxsə həbslə bağlı olmayan cəza təyin etməyi xahiş edib.
Mahir Quliyev də son sözündə vəkilinin çıxışını müdafiə edib.

Prosesdə hökm oxunub. Hökmə əsasən, Mahir Quliyev 11 il müddətinə azadlıqdan məhrum olunub.

Xatırladaq ki, Biləsuvarın sabiq icra başçısı 2020-ci il aprelin 29-da Dövlət Təhlükəsizliyi Xidməti (DTX) tərəfindən keçirilən əməliyyatla həbs edilib.

İstintaq orqanı tərəfindən Mahir Quliyevə Cinayət Məcəlləsinin 179-cu (mənimsəmə və isriaf etmə), 308.1-ci (vəzifə səlahiyyətlərindən sui-istifadə etmə), 311.3.2-ci (təkrar rüşvət alma) və 313-cü (vəzifə saxtakarlığı) maddələri ilə ittiham elan edilib.

Qeyd edək ki, M.Quliyevin əmlaklarının müsadirə olunması barədə qərar çıxarılıb.

Qərara əsasən, təqsirləndirilən şəxsə və onun ailə üzvlərinə aid olan 1 milyon 34 min manatlıq əmlaklar da müsadirə olunub.

Üzərinə həbs qoyulmuş əmlakların siyahısını:

1. Bakı şəhərində yerləşən, 2005-ci ildə alınmış mənzil;

2. "Audi" markalı avtomobil;

3. Bakı şəhərində yerləşən daha bir mənzil.

Bundan başqa, "Dost" İş Mərkəzi tərəfindən qaldırılmış 121 min manatlıq mülki iddia təmin olunub.

Qeyd edək ki, Mahiq Quliyev məhkəmənin hökmü ilə 11 il azadlıqdan məhrum edilib.