İstidə necə yuxuya getmək olar? - Effektiv məsləhətlər

Termometr 30°C və daha yuxarı dərəcəni göstərdikdə, yuxuya getmək çətinləşə bilər. Orqanizmimiz sərin şəraitdə daha rahat yuxuya gedir, çünki yuxu zamanı bədən temperaturu təbii olaraq azalır. Lakin otaqda hava isti olduqda, bu proses pozulur və bədən istirahətə deyil, özünü soyutmağa enerji sərf edir.

Bu barədə Lent.az məlumat verir:

Otaqda sərinliyi qoruyun
Gecə rahat yatmaq üçün gün ərzində gün düşən pəncərələrin pərdələrini və şüşələrini qapalı saxlayın. Bu, otaqda istiliyin artmasının qarşısını alır. Axşamlar hava sərinləşərsə və yüngül külək əsərsə, pəncərələri açaraq təbii havalandırma yaradın. Hava hələ də istidirsə, ventilyator istifadə edin.

Yataq dəstinizi dəyişin
Yay aylarında pambıq və ya digər təbii materiallardan hazırlanmış yataq dəstinə üstünlük verin. Sintetik materiallar (məsələn, poliester) istiliyi saxlayır və tərləmisinizsə dərinizə yapışa bilər. Açıq rəngli yataq dəstləri daha yaxşı hava keçirir.

“100% pambıq və ya kətan yataq dəstini seçin. Kətan nəm olduqda daha da möhkəmlənir. Pambıqdan fərqli olaraq, o, nəmliyi udsa da, dəridə yaşlıq hissi yaratmır – bu da onu yay gecələri üçün ideal edir”.

Adi rejiminizi qoruyun
İstidə belə normal yatmaq və yemək rejiminizi qoruyun. Gündəliyin pozulması yuxusuzluğa səbəb ola bilər.

Su balansını qoruyun
Gün ərzində kifayət qədər su için – isti havalarda bu xüsusilə vacibdir. Susuzluq yuxuya getməni çətinləşdirə bilər.

Yatmazdan əvvəl soyuq duşa girməyin
Gündüz soyuq duş sərinlik versə də, gecə üçün uyğun deyil. Soyuq su yalnız dərini soyudur, bədəni isə yox. İlıq duş isə orqanizmin özünü daha səmərəli şəkildə soyutmasına səbəb olur. Həmçinin bileklərə və boyuna soyuq kompres qoymaq faydalıdır.

Axşam spirtli içkiləri azaldın
Yayda pikniklərdə və açıq havada vaxt keçirərkən spirtli içki içmək cazibədar olsa da, axşam saatlarında çox içmək yuxunun keyfiyyətini pisləşdirir. Alkoqolu az miqdarda və yatmazdan əvvəl deyil, daha erkən saatlarda qəbul etmək məsləhətdir.

Kofeini məhdudlaşdırın
Günün ikinci yarısında kofeinli içkilərdən uzaq durun – bu, bədəndən maye itkisini sürətləndirir və susuzluq yarada bilər. Bunun əvəzinə təzə meyvə şirələri əla alternativdir.