Çexiyalı rektor Bakı Ali Neft Məktəbində olub

Çexiyanın Praqa Karls Universitetinin rektoru, professor Vatslav Hampl və universitetin elm və yaradıcılıq fəaliyyəti üzrə prorektoru, professor Petr Volf Bakı Ali Neft Məktəbində (BANM) olublar. Məktəbin mətbuat xidmətindən Lent.az-a verilən məlumata görə, qonaqları salamlayan rektor Elmar Qasımov BANM-in Azərbaycan prezidenti İlham Əliyevin irəli sürdüyü “Biz neft kapitalını insan kapitalına çevirməliyik” şüarının yerinə yetirilməsi üçün yeni yaradılmış ali təhsil müəssisəsi olduğunu bildirib, fəaliyyətinin 2 ili ərzində məktəbin Tələbə Qəbulu üzrə Dövlət Komissiyasının tərtib etdiyi reytinq cədvəlində lider olduğunu, mütəxəssis hazırlığının Böyük Britaniyanın Heriot-Vatt Universitetinin proqramları əsasında həyata keçirildiyini, məzunlara 2 diplom veriləcəyini və təhsil müəssisəsi üçün yeni kampus tikildiyini vurğulayıb.

Rektor BANM-in Karls Universiteti və Çexiyanın digər universitetləri ilə əməkdaşlıq əlaqələrinin yaradılmasında maraqlı olduğunu bildirib.

BANM-ə dəvət olunduğuna görə minnətdarlığını bildirən professor Vatslav Hampl müasir tipli ali məktəbin yaradılmasının təqdirəlayiq olduğunu vurğulayıb, rəhbərlik etdiyi universitetlə kimya, geologiya, geofizika sahələrində təhsillə bağlı əməkdaşlığın mümkün olduğunu və BANM-in Çexiyanın digər mühəndis hazırlayan universitetləri ilə əlaqələrinin qurulmasında yardım göstərməyə hazır olduğunu bildirib.

Görüşün sonunda qonağa BANM-in “Fəxri qonaq diplomu” təqdim edilib.