İcra başçısı hərbçiləri mükafatlandırdı

Bərdədə ordu ilə xalqın birliyini nümayiş etdirən “Gənclər gələcəyimizdir” hərbi vətənpərvərlik tədbiri keçirilib. Lent.az-ın məlumatına görə, ölkə prezidenti, Silahlı Qüvvələrin Ali Baş komandanı İlham Əliyevin doğum gününə həsr olunmuş tədbir Müdafiə Nazirliyinin və Bərdə rayon İcra Hakimiyyətin birgə təşkilatçılığı ilə baş tutub.

Tədbirdə Müdafiə Nazirliyinin ordu birləşmələrinin zabit, gizir, əsgər, çavuş heyətinin nümayəndələri, Bərdə rayon İcra Hakimiyyətinin başçısı Vidadi İsayev, aparatın məsul işçiləri, YAP rəhbərliyi, KİV və ictimayyət nümayəndələri, məktəblilər iştirak edib.

Tədbiri giriş sözü ilə Müdafiə Nazirliyi ordu birləşməsinin zabiti Həbib Məmmədov açıb. Sonra H.Məmmədov sözü Bərdə rayon İcra Hakimiyyətinin başçısı V.İsayevə verib. V.İsayev çıxışına tədbir iştirakçılarını qarşıdan gələn 31 dekabr Dünya Azərbaycanlılarının Həmrəyliyi günü və Yeni il münasibətilə təbriklə başlayıb: “Bu gün prezident İlham Əliyevin məhz uğurlu siyasəti nəticəsində Azərbaycan beynəlxalq aləmdə güclü iqtisadiyyata malik bir ölkə kimi tanınmaqla yanaşı, həm də NATO standartlarına uyğunlaşmış modern bir ordusunun olması ilə də diqqəti cəlb edir. Biz inanırıq ki, İlham Əliyevin rəhbərliyi ilə tezliklə mənfur ermənilərin işğalı altında qalmış torpaqlarımız geri alınacaq, qələbəmizi Şuşada qeyd edəcəyik”.

Tədbir hərbi qulluqçular, Bərdə Gənclər və İdman idarəsi və Təhsil Şöbəsinin nümayəndələri, məktəblilər, Qarabağ müharibəsi veteranlarının çıxışları ilə davam etdirilib.

Daha sonra tədbirdə Bərdə rayon İcra Hakimiyyətinin başçısı V.İsayev və ordu birləşməsinin məsul nümayəndələri tərəfindən təhsildə seçilən məktəblilərə və döyüş tapşırığının yerinə yertirilməsində xüsusi ilə fərqlənən hərbi qulluqçulara qiymətli hədiyyələr təqdim edilib. Sonda tədbir konsert proqramı ilə yekunlaşıb.