Yeni media layihəsi, BİZNESTÜRK TV YARADILDI -VİDEO

Azərbaycanın Türkiyədəki Ticarət Nümayəndəliyi və MÜSİAD Azərbaycanın birgə təşəbbüsü ilə böyük media layihəsinə start verilir.

Bu barədə Lent.az-a MÜSİAD Azərbaycandan məlumat verilib.

Hazırda Azərbaycan və Türkiyə iş dünyası arasında əlaqələr yeni strateji mərhələyə qədəm qoyur.

İki ölkə arasındakı iqtisadi əməkdaşlığın dərinləşdirilməsi, biznes diplomatiyasının gücləndirilməsi və Türkiyə şirkətlərinin Azərbaycandakı uğurlarının dünyaya təqdim olunmasını hədəfləyən nəhəng media layihəsi bu mənada maraqlı səhnə açacaq.

Azərbaycanın Türkiyədəki Ticarət Nümayəndəliyi və MÜSİAD Azərbaycanın dəstəyi ilə reallaşdırılan layihə çərçivəsində Azərbaycanda uğurlu fəaliyyəti ilə seçilən Türkiyəli iş adamlarının iş və həyat təcrübələri geniş ictimaiyyətə təqdim olunacaq.

Türk Dövlətləri Təşkilatına üzv ölkələrin media resurslarında da iş adamlarının biznes strategiyaları, qarşıya qoyduqları məqsədlər və regional iqtisadiyyata töhfələri nümayiş etdiriləcək.

Media layihəsi dünya çapında geniş yayılacaq və bu da Azərbaycan üçün qlobal iqtisadi informasiya platforması rolunu oynayacaq.

Bu layihə üçün BİZNESTÜRK TV, yeni YouTube kanalı fəaliyyətə başlayır.

Layihə çərçivəsində aparılan çəkilişlər, müsahibələr və media xəbərləri vasitəsi ilə ölkəmizdəki stabillik, qanunvericilik şəffaflığı, biznesə dövlət dəstəyi və biznes üçün münbit şəraitin olduğu beynəlxalq ictimaiyyətə təqdim olunacaq.

Paytaxt Bakıdan regionlara qədər yeni sənaye zonaları, logistika imkanları, nəqliyyat xətləri və “yaşıl enerji” siyasətinin yaratdığı perspektivlər investor dilindən dünyaya elan ediləcək. Bu layihə məlumat mübadiləsi ilə yanaşı “Türkiyə-Azərbaycan-Mərkəzi Asiya” iqtisadi xəttinin informasiya platformasına çevriləcək.

Bu təşəbbüs yalnız biznes sahəsi ilə məhdudlaşmır, mədəni və sosial inteqrasiyaya da töhfə verəcək. Layihə həm də Türkiyə və Azərbaycan arasında möhkəmlənən iqtisadi dostluğun media arxivinə çevriləcək.

Layihəni Azərbaycanın ən böyük media platformalarından olan Modern Media Qrup icra edəcək.

Layihənin ilk qonağı ZİVELLA-nın sahibi Abdurrahman Uzndur.

Videonun linki: https://youtu.be/gsBejSQPXA4?si=h1wL7mTljsSjO5S6