Doğum evində FACİƏ: 6 yaşlı uşaq yeni doğulan körpəni öldürdü

Fransanın şimalında yerləşən Lil şəhərində Zayneb-Kassandra adlı beş günlük körpə qızcığaz yenidoğulmuşlar palatasında nəzarətsiz qalan altı yaşlı uşağın çarpayıdan atmasından sonra faciəvi şəkildə dünyasını dəyişib.

Lent.az bildirir ki, bu barədə Fransa mətbuatı prokurorluğa və hadisənin şahidlərinə istinadən məlumat yayıb.

Faciə Jeanne-de-Flandre xəstəxanasında baş verib. Qeysəriyyə əməliyyatı ilə vaxtından 6 həftə əvvəl doğulan körpə reanimasiya şöbəsində olub. Həkimlər iki dəfə reanimasiya ediblər, lakin iyulun 16-da bir neçə gün həyati dəstəkdən sonra qız ölüb.

Lill prokurorluğunun məlumatına görə, ölümün rəsmi səbəbi "hündürlükdən döşəməyə yıxılma ilə uyğun gələn" kəllə-beyin travması olub. Şahidlərin bildirdiyinə görə, uşaqla qohumluğu olmayan bir oğlan onun çarpayısının yanında stulda oturub. Onun qızı çarpayıdan çıxarıb yerə saldığı güman edilir.

Doğum evinin başqa bir xəstəsi, yenicə doğuş edən Delfin körpəni yerdə görüb - o, yüksək səslə qışqırıb və qaçaraq gəlib. Onun sözlərinə görə, oğlan bir neçə gün böyüklərin nəzarəti olmadan palatada qaçıb, başqa körpələrə toxunub və başqalarının otağına girib.

"O, artıq bir dəfə uşaq arabasında körpəyə toxunmuşdu. Anası da xəstədir və ona baxa bilmirdi", - qadın deyib.

Ailə xəbərdarlıqlara məhəl qoymayıb

Ölən uşağın atasının əmisi oğlu Karimə deyir ki, oğlanın “qeyri-adi davranışı” ilə bağlı işçilərə xəbərdarlıq edilib. O deyir ki, qız bir gün əvvəl uşaq bezi, yaş və hipotermiya əlamətləri ilə tapılıb. Oğlan Zaynebi "onun kuklası" adlandırıb və onunla daim maraqlanıb.

Zaynebin nənəsi bildirib ki, uşağın atası onu hər gün səhər saat 7-dən axşam 8-ə kimi palatada qoyub, ona baxa bilmir. Tibb işçiləri, qadının sözlərinə görə, özlərini narahat hiss etsə də, müvafiq tədbirlər görməyib.

"Bir dəfə o, Zaynebi uşaq bezindən çıxarmağa çalışıb - o, yəqin ki, həmin vaxt yıxıb", - nənə deyib.

Qızın 23 yaşlı atası Mohamed-Hamza oğlanı və ya anasını günahlandırmadığını, lakin xəstəxananın laqeydliyindən şoka düşdüyünü deyib.

"Altı yaşlı uşaq belə şeylərə görə məsuliyyət daşıya bilməz. Bəs işçilər harada idi? Təhlükəsizliyə kim nəzarət edirdi?" - o, jurnalistlərə bildirib.

Ailə rəsmi şikayət etməsə də, ədalət axtarışındadır. Qızın anası ağır psixoloji vəziyyətdədir - yalnız yaxınlarının təkidindən sonra xəstəxana ona psixoloji yardım göstərməyə razılıq verib.

İstintaq başlayıb

Yerli polis cinayət işi açıb, xəstəxana daxili xidmət araşdırmasına başlayıb. Xəstəxana rəhbərliyi faciəni “müalicə prosesi ilə bağlı olmayan qeyri-adi və dərin faciəli hadisə” adlandırıb.

Klinika artıq müvəqqəti tədbir olaraq neonatal palatalara səfərləri məhdudlaşdıracağını açıqlayıb.

"Bu, qızımı mənə qaytarmayacaq, amma biz kimin və harada səhv etdiyini bilmək istəyirik. Və günahkarların cəzalandırılmasını təmin edəcəyik", - Zaynebin atası söyləyib.