Moskvada ruslarla qafqazlıların toqquşması gözlənilir

Moskvanın Manej meydanına çoxlu sayda xüsusi təyinatlı milis əməkdaşları gətirilib. Lent.az-ın “RİA Novosti” agentliyinə istinadən verdiyi məlumata görə, buna səbəb rusiyalı futbol azarkeşləri ilə Qafqaz əsilli şəxslər arasında toqquşmanın gözlənilməsi barədə yayılan xəbərlərdir.

Hüquq-mühafizə orqanlarındakı mənbə bildirib ki, tərəflər kütləvi davanın vaxtını saat 18:00-a (Bakı vaxtı ilə 19:00) təyin ediblər. Moskva Şəhər Daxili İşlər İdarəsi vətəndaşları qanunsuz aksiyada iştirak etməməyə çağırıb.

Qeyd edək ki, dekabrın 11-də Manej meydanında kütləvi qarşıdurma olub. Bir müddət əvvəl Kabardin-Balkar əsilli şəxsi tərəfindən öldürüldüyü bildirilən “Spartak” futbol klubunun azarkeşi Yeqor Sviridovun xatirəsinə həsr olunmuş aksiya etnik xarakter alıb. Aksiya iştirakçıları millətçi xarakterli şüarlar səsləndirib, hüquq-mühafizə orqanları ilə qarşıdurmaya gediblər. 40 nəfər, o cümlədən milis əməkdaşları yaralanıb. 7 nəfər xəstəxanada yerləşdirilib. 80 nəfər saxlanılıb, 10-dan çox cinayət işi açılıb.