Moskvada qafqazlılarla rusların yeni qarşıdurması gözlənilir

Lent.az-ın “RİA Novosti” agentliyinə istinadən verdiyi məlumata görə, xüsusi təyinatlı milis bölmələri “Yevropeysk” ticarət kompleksi yaxınlığında 3 avtobus və 10 minik avtomobilində gözləməkdədirlər.

Qeyd edək ki, Rusiya mətbuatı dekabrın 11-də Manej meydanında rus futbol azarkeşlərinin qanunsuz keçirdiyi aksiya və qafqazlılara, Orta Asiya əsilli insanlara cavab olaraq Şimali Qafqaz əsilli şəxslərin Kiyev vağzalı qarşısında meydana toplaşacaqları barədə məlumat yayıb.

Xatırladaq ki, dekabrın 11-də Manej meydanında kütləvi qarşıdurma olub. Bir müddət əvvəl Kabardin-Balkar əsilli şəxsi tərəfindən öldürüldüyü bildirilən “Spartak” futbol klubunun azarkeşi Yeqor Sviridovun xatirəsinə həsr olunmuş aksiya etnik xarakter alıb. Aksiya iştirakçıları millətçi xarakterli şüarlar səsləndirib, hüquq-mühafizə orqanları ilə qarşıdurmaya gediblər. 40 nəfər, o cümlədən milis əməkdaşları yaralanıb. 7 nəfər xəstəxanada yerləşdirilib. 80 nəfər saxlanılıb, 10-dan çox cinayət işi açılıb.