Əbu-Dabidə həkimlər doğulduqları gündən baş nahiyələri bitişik olan siam əkizlərini uğurla ayırıblar.
Lent.az xarici KİV-ə istinadla bildirir ki, əməliyyat Nigeriyadan olan 19 aylıq Mersi və Qudness adlı bacılar üzərində aparılıb. Qızlarda kraniopaqiya adlanan nadir siam əkizliyi forması olub. Bu zaman əkizlər kəllə sümükləri, qan damarları və bəzi hallarda beyin toxumaları vasitəsilə bir-birinə bitişik olur.
Cərrahlar qrupuna Londondakı “Great Ormond Street” Xəstəxanasının uşaq neyrocərrahı, professor Nur ul Ovase Cilanı rəhbərlik edib. Əməliyyatda Böyük Britaniya, Birləşmiş Ərəb Əmirliyi, Braziliya və Nigeriyadan olan mütəxəssislər də iştirak ediblər.
Əkizlərin ayrılmasına hazırlıq bir neçə ay davam edib. Həkimlər qan damarları və beyin strukturlarının dəqiq xəritəsini hazırlamaq üçün üçölçülü modelləşdirmə, virtual reallıq və süni intellekt texnologiyalarından istifadə ediblər.
Müalicə ümumilikdə dörd aydan çox davam edib və dörd mərhələdən ibarət olub. Həkimlər ümumilikdə 40 saatdan artıq əməliyyat otağında çalışıblar. Sonuncu əməliyyat təxminən 12 saat davam edib.
Əməliyyatın ən çətin tərəfi qızların ümumi qan damarlarına və bəzi toxumalara malik olması idi. Bu isə ağır fəsadların yaranma riskini xeyli artırırdı.
Uğurlu bərpanı təmin etmək üçün cərrahlar əvvəlcədən qızların baş dərisinin altına xüsusi toxuma genişləndiriciləri yerləşdiriblər. Bu üsul ayrılmadan sonra kifayət qədər dəri ehtiyatının yaranmasına və əlavə dəri köçürülməsinə ehtiyac qalmamasına imkan verib.
Həkimlərin sözlərinə görə, bu əməliyyat onların karyerasında həyata keçirdikləri ən mürəkkəb cərrahi müdaxilələrdən biri olub. Müalicə başa çatdıqdan sonra hər iki qız tam sağalıb və valideynləri ilə birlikdə evə qayıdıb.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
