Tramp seçiləndən bəri hökumət artıq hər gün 1 milyard dollara qənaət edir

ABŞ-də sahibkar İlon Maskın rəhbərlik etdiyi Hökumətin Səmərəliliyi Departamenti (DOGE) artıq ABŞ hökumətinə gündə 1 milyard dollar qənaət etdiyini və bu rəqəmi gündə 3 milyard dollara çatdıracağını iddia edir.

APA xəbər verir ki, bu barədə idarənin “X” hesabındakı açıqlamasında bildirilir.

"DOGE federal hökumətə gündə təxminən 1 milyard dollar qənaət edir. Əsasən lazımsız vəzifələr üçün işə qəbulu dayandırmaq, DEI (müxtəliflik, bərabərlik və inkluzivlik) proqramlarını ləğv etmək və xarici qurumlara əsassız ödənişlərə son qoymaq - hamısı prezidentin sərəncamlarına uyğun olaraq. Bu, əla başlanğıcdır, lakin biz bu rəqəmi gündə 3 milyard dollardan çox artırmalıyıq", - deyə bəyanatda deyilir.

Qeyd edək ki, İlon Mask ABŞ prezidenti Donald Tramp tərəfindən DOGE - Hökumətin Səmərəliliyi Departamenti adlı agentliyin rəhbəri vəzifəsinə təyin edilib.