Braziliyanın şimal-şərq sahillərində yerləşən İtamaraka adasında təxminən 8 min şüşə butulkadan istifadə edilərək qeyri-adi ev tikilib. “Casa de Sal” (“Duz evi”) adlanan yeddiotaqlı evin dam örtüyü isə diş məcunu tüplərinin təkrar emalından hazırlanan kirəmitlərdən ibarətdir.
Lent.az xarici mediaya istinadla xəbər verir ki, layihənin müəllifləri Edna Dantas və onun qızı Mariya Qabrielli Dantasdır. Ana və qız çimərliklərdəki tullantıları tikinti materialına çevirərək özlərinə ev qurublar.
İdeya pandemiya dövründə yaranıb
Hər şey COVID-19 pandemiyası zamanı başlayıb. Həmin vaxt ana və qız İtamaraka adasında yaşamaq üçün ev axtarıblar. Çimərliklərdə və manqrov kolluqlarında turistlərin qoyub getdiyi boş butulkalar və digər tullantılar onların diqqətini çəkib.
Edna və Mariya bu tullantılara təkcə ekoloji problem deyil, həm də pulsuz tikinti materialı kimi yanaşıblar. Əvvəlcə evin əsas konstruksiyasını qurublar. Daha sonra uyğun materiallar tapdıqca digər hissələri tamamlayıblar. Mediada yayılan məlumatlara görə, tikinti bir neçə il davam edib.
Şüşə divarlar otaqları rəngli işıqla doldurur
Evin divarlarında butulkalar üfüqi deyil, şaquli şəkildə yerləşdirilib. Şüşədən keçən təbii işıq vitrajı xatırladan görüntü yaradır və otaqları rəngli işıq çalarları ilə doldurur.
Tikintidə butulkalarla yanaşı, əvvəllər istifadə olunmuş taxta materiallardan və taxta altlıqlardan da geniş istifadə edilib. Altlıqlar müxtəlif otaqların qurulmasında əsas rol oynayıb. Dam üçün isə boş diş məcunu tüplərindən hazırlanan kirəmitlər seçilib.
Tikinti davam edərkən evdə yaşayıblar
İşlərin ilk mərhələsində “Casa de Sal”da adi hamam otağı və müasir məişət şəraiti olmayıb. Buna baxmayaraq, Edna və qızı tikinti gedən ərazidə yaşayıblar.
Onların əzmkarlığı və qeyri-adi layihəsi sonradan Braziliyada geniş maraq doğurub. Edna Dantas “Metrópoles” nəşrinə müsahibəsində bildirib ki, şüşə divarlar həm yaratdığı xüsusi işıqlandırma, həm də estetik görünüşü ilə evin əsas özəlliyinə çevrilib.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
