Tərtərdə şəhid olmuş əsgərlərimiz torpağa tapşırılıb

APA-nın müxbirlərinin məlumatına görə, şəhid Əmirov Vüqar Əmirəli oğlu doğulduğu İmişli rayonu Xosçobanlı, şəhid Abdullayev Pərvin Nəbi oğlu isə doğulduğu Sabirabad rayonunun Xəlfəli kəndində bu gün torpağa tapşırılıb.

Dəfn mərasimlərində hərbçilər, icra hakimiyyəti orqanlarının təmsilçiləri, ictimaiyyət nümayəndələri və yerli sakinlər iştirak ediblər.

Qeyd edək ki, avqustun 31-də saat 16.30-da Ermənistan silahlı bölmələrinin təxribat qrupu Tərtər rayonunun Çaylı kəndi istiqamətindəki qoşunların təmas xəttini keçərək Azərbaycan Silahlı Qüvvələrinə qarşı hücuma cəhd edib. Azərbaycan Müdafiə Nazirliyinin mətbuat xidmətindən APA-ya verilən məlumata görə, bu zaman şiddətli atışma baş verib. Azərbaycan əsgərinin güclü müqaviməti nəticəsində düşmən 3 itki və bir neçə yaralı verərək geri oturdulub.

Döyüş zamanı Azərbaycan Ordusunun 2 əsgəri - 2009-cu ilin aprelində İmişli Rayon Hərbi Komissarlığından hərbi xidmətə çağırılmış, 1991-ci il təvəllüdlü Əmirov Vüqar Əmirəli oğlu və 2009-cu ilin aprelində Sabirabad Rayon Hərbi Komissarlığından hərbi xidmətə çağırılmış, 1991-ci il təvəllüdlü Abdullayev Pərvin Nəbi oğlu qəhrəmancasına şəhid olublar.