Bakıda baş verən silahlı insidentin daha bir iştirakçısı tutuldu

Azərbaycan paytaxtında baş vermiş silahlı insidentin daha bir iştirakçısı həbs edilib. Bu barədə APA-ya Suraxanı rayon Polis İdarəsindən məlumat verilib.

İyulun 1-də Suraxanı qəsəbəsində baş vermiş silahlı insidentlə bağlı daha bir nəfər saxlanılıb. Hadisənin iştirakçısı olan Tural Sərxan oğlu İspatov barəsində məhkəmənin hökmü ilə həbs qətimkan tədbiri seçilib. Hadisə ilə əlaqədar əməliyyat-axtarış tədbirləri davam etdirilir.

Qeyd edək ki, məlum cinayət hadisəsi iyulun 1-də, saat 20.06 radələrində Suraxanı qəsəbəsindəki A. Rzayev küçəsində qeydə alınıb. 2 “VAZ-2107” markalı və 1 “Mercedes” markalı avtomaşınların sürücüləri tərəfindən avtoxuliqanlıq hərəkətləri edilib və odlu silahdan atəş açılıb.

Suraxanı rayon Polis İdarəsinin (RPİ) 31-ci Polis Bölməsi (PB) əməkdaşları tərəfindən hadisə yerindən 3 ədəd tapança gilizi götürülüb. Aparılan araşdırmalar zamanı avtomaşınların Bakı şəhər sakinləri Anar Dadaşov, Mövsüm Nuriyev və Pərviz Tağıyevə məxsus olmaları müəyyən edilib. Həyata keçirilən əməliyyat-axtarış tədbirləri nəticəsində “VAZ-2107” markalı avtomaşının sürücüsü A. Dadaşov saxlanılıb.

Faktla əlaqədar Azərbaycan Respublikası Cinayət Məcəlləsinin 221 (Xuliqanlıq) və 228-ci (Qanunsuz olaraq odlu silah gəzdirmə) maddələri ilə cinayət işi başlanıb. Araşdırmalar aparılır.