Bacı qatilinə 10 il həbs

Ağır Cinayətlərə Dair İşlər üzrə Məhkəmədə bacısını qətlə yetirən Kürdəmir rayon sakininin cinayət işi üzrə məhkəmə prosesi başa çatıb. Lent.az-ın məlumatına görə, hakim Əlisoltan Osmanovun sədrliyi ilə keçirilən prosesdə təqsirləndirilən İlyas Süleymanova hökm oxunub. Hökmə əsasən, İ. Süleymanov 10 il müddətinə azadlıqdan məhrum edilib.

İttihama görə, 2010-cu il yanvarın 25-də rayonun Topalhəsənli kənd sakini, 1963-cü il təvəllüdlü İ. Süleymanov bacısı, 1969-cu il təvəllüdlü Süleymanova Lətafət Süleyman qızını kəndirlə boğaraq öldürüb. Sonra onun meyitini öz həyətinə gətirərək torpağa basdırıb. Yanvarın 27-də Rayon Polis şöbəsinin əməkdaşlarının əməliyyat-axtarış tədbirləri nəticəsində İ. Süleymanov tutularaq istintaqa təhvil verilib. O, bacısını namus üstündə öldürdüyünü etiraf edib.

Qeyd edək ki, İ. Süleymanov Azərbaycan Respublikası Cinayət Məcəlləsinin 120.1-ci (qəsdən adam öldürmə) maddəsi ilə ittiham olunub.

Fərid Əkbərov