FHN yanğın-taktiki təlim keçirib

Sentyabrın 3-də ARDNŞ-in Sumqayıt şəhərində yerləşən “Azərkimya” İstehsalat Birliyinin “Etilen-Polietilen” zavodunun “J-70” sexində Fövqəladə Hallar Nazirliyinin (FHN) Dövlət Yanğından Mühafizə Xidmətinin (DYMX) Bakı və Sumqayıt qarnizonlarının şəxsi heyəti və obyektin mühəndis-texniki heyəti cəlb olunmaqla yanğın-taktiki təlim keçirilib. Lent.az-ın Fövqəladə Hallar Nazirliyinin rəsmi saytına istinadən verdiyi məlumata görə, təlimin keçirilməsində məqsəd obyektin mühəndis-texniki heyətinin yanğın zamanı hərəkətlərini, DYMX-nin şəxsi heyətinin mürəkkəb şəraitlərdə baş verən yanğınlar zamanı bilik və bacarıqlarının yoxlanılması, ekstremal vəziyyətlərdə psixoloji hazırlıqlarının və peşə vərdişlərinin təkmilləşdirilməsi olub.

Keçirilən yanğın-taktiki təlimə 12 ədəd müxtəlif su tutumlu əsas yanğın avtomobilləri, 1 ədəd avtonərdivan, 1 ədəd sənaye yanğın avtomobili, 4 ədəd xüsusi təyinatlı yanğın avtomobili, DYMX-nin 120 nəfər şəxsi heyəti və “Azərkimya”nın 80 nəfərdən artıq mühəndis-texniki heyəti cəlb olunub.