Fevralda atəşkəs 56 dəfə pozulub

APA-nın Azərbaycan Müdafiə Nazirliyinin rəsmi məlumatları əsasında apardığı monitorinqin nəticələrinə görə, atəşkəsin pozulması nəticəsində Azərbaycan Ordusunun 2 əsgəri şəhid olub, 2 əsgəri isə yaralanıb.

Ötən ay ermənilər atəşkəsi daha çox Füzuli rayonu istiqamətində pozublar - 23 dəfə. Bu istiqamətdə atəşkəsin pozulması nəticəsində Azərbaycan Ordusunun bir əsgəri yaralanıb.

Ermənilər fevralda Qazax rayonu istiqamətində - Ermənistan-Azərbaycan dövlət sərhədində və Qazax rayonunun işğal olunmuş kəndlərindəki mövqelərindən Azərbaycan Ordusunun mövqelərini 14, Ağdamda 9, Tərtərdə 6, Goranboyda 3, Xocavənddə isə 1 dəfə atəşə tutub.

Qeyd edək ki, yanvar ayında Ermənistan Ordusu tərəfindən Qarabağ cəbhəsində və Ermənistan-Azərbaycan dövlət sərhədində atəşkəs rejimi 24 dəfə pozulub. Ümumilikdə 2011-ci ilin iki ayı ərzində atəşkəsin pozulması nəticəsində Azərbaycan Silahlı Qüvvələrinin 4 hərbi qulluqçusu şəhid olub, 4 nəfər isə yaralanıb.