Şəhəri həyəcanlandıran HADİSƏ: Gecə kanalizasiya quyusuna girən kişilər nə axtarır? - VİDEO

Nyu-Yorkda gecə saatlarında bir qrup kişinin kanalizasiya sisteminə daxil olması ilə bağlı müəmmalı hadisələr qeydə alınıb. Bir neçə rayonda müşahidə olunan bu hallar sakinlər arasında narahatlıq yaradıb, polis isə araşdırmalara başlayıb.

Lent.az xarici mediaya istinadla xəbər verir ki, ilk hadisə Bruklinin Uilyamsburq rayonunda gecə saatlarında baş verib.

Müşahidə kameralarının qeydə aldığı görüntülərdə təxminən altı nəfərdən ibarət qrupun ağır çuqun kanalizasiya qapağını qaldıraraq şəhərin kanalizasiya sisteminə endiyi görünür. Məlumata görə, onlar bir neçə saat yer altında qaldıqdan sonra səhər saatlarına yaxın yenidən səthə çıxıblar. Şəxslərin çirkli geyimlərini küçədə ataraq yaxınlıqda gözləyən avtomobillərlə ərazidən uzaqlaşdığı bildirilir.

Oxşar hadisələr həmin gecə Bruklinin digər rayonu olan Qreyvsenddə də baş verib. Burada da bir neçə nəfərin kanalizasiya quyularından çıxması müşahidə olunub. Bir neçə gün sonra analoji hadisənin şəhərin Kvins bölgəsində qeydə alındığı açıqlanıb.

Baş verənlər sosial şəbəkələrdə müxtəlif fərziyyələrin yayılmasına səbəb olub. Bəzi sakinlər bunun mümkün sabotaj, terror təhlükəsi və ya yeraltı kommunikasiya vasitəsilə bank anbarlarına giriş cəhdi ola biləcəyini irəli sürüblər.

Nyu-York polisi və şəhərin ətraf mühit qurumları məsələ ilə bağlı yoxlamalara başlayıb. Xüsusi qoruyucu geyimdə çalışan qruplar kanalizasiya tunellərində araşdırma aparıb. İlkin nəticələrə əsasən, şəhər infrastrukturunda hər hansı zədələnmə, partlayıcı maddə və ya sabotaj izi aşkar edilməyib.

İstintaq çərçivəsində sonradan hadisələrlə bağlı fərqli ehtimal irəli sürülüb. Polis mənbələrinin məlumatına görə, şəxslər kanalizasiya sisteminə itirilmiş sikkələr, zinət əşyaları, pul kisələri və təkrar emala yararlı metalları toplamaq məqsədilə daxil olublar. Bildirilir ki, bu cür şəhər xəzinə ovu bəzi ölkələrdə rast gəlinən praktika olsa da, Nyu-York üçün qeyri-adi hesab edilir.

Polis isə kanalizasiya sisteminə qanunsuz daxil olmağın cinayət hesab olunduğunu və həm zəhərli qazlar, həm də qəfil su basması səbəbindən həyat üçün ciddi təhlükə yaratdığını vurğulayaraq vətəndaşları şübhəli fəaliyyət barədə məlumat verməyə çağırıb.