Bakıda bir gündə yol qırğını: 5 nəfər ölüb

Şənbə günü Bakıda baş vermiş 4 yol qəzası nəticəsində 5 nəfər ölüb. Lent.az-ın Bakı şəhər Baş Polis İdarəsinə istinadən verdiyi məlumata görə, avqustun 3-ü saat 08 radələrində Sabunçu rayonu B.Bünyatov küçəsində Cəbrayıl rayon sakini Elnur Hüseynov idarə etdiyi «VAZ-21114» markalı avtomobillə Bakı şəhər sakini İlqar Süleymanovu vurub, sonuncu hadisə yerində ölüb. Bundan başqa Sabunçu rayonu ərazisində, Şəhər şosesində Lerik rayon sakini Ramiq Hadıyev idarə etdiyi «Volksvagen» markalı avtomobillə Bakı şəhər sakini Azər Abbasovu vurub, piyadaçı 3 saylı xəstəxanada ölüb.

Avqustun 3-ü saat 00:25 radələrində Suraxanı rayonu Nəqliyyat küçəsində Bakı şəhər sakinləri Ramin Qasımovun idarə etdiyi «VAZ-2106» markalı və Masallı rayon sakini Emin Əliyevin idarə etdiyi «BMV» markalı avtomobillər toqquşub. Nəticədə, R.Qasımov aldığı xəsarətdən xəstəxanada ölüb. Avqustun 3-ü saat 16 radələrində Xətai rayonunun Zeytun küçəsində baş vermiş hadisədə isə 2 nəfər ölüb. Bakı şəhər sakinləri Rüfət Hüseynovun idarə etdiyi «Kia-Carens» markalı və Qubadlı rayon sakini Sevindik Zeynalovun idarə etdiyi «VAZ-21063» markalı avtomobillər toqquşub. Nəticədə, S.Zeynalov, sərnişini Mirzə Xalıqov hadisə yerində ölüb, R.Hüseynov və sərnişinləri - Cahid Əliyev, Fərman Əhmədov və Səbuhi Mikayılov xəsarətlə xəstəxanaya yerləşdiriliblər.