Pişiklər maşında niyə dayanmadan miyoldayır?

Pişiklər avtomobillə səyahət etməyi adətən sevmirlər. Yol boyu yüksək səslə miyoldayaraq narazılıqlarını göstərirlər. Bəs bunun səbəbi nədir və ev heyvanının səfəri daha rahat keçirməsinə necə kömək etmək olar?

Lent.az xarici mediaya istinadən xəbər verir ki, avtomobildə heç olmasa bir dəfə pişik aparan sürücülər belə səfərin nə qədər yorucu, hətta əsəbiləşdirici ola biləcəyini yaxşı bilirlər. Səyahət nə qədər davam etsə də, pişik yol boyu yüksək səslə miyoldaya və daşıma çantasından çıxmağa çalışa bilər.

Bəs pişiklər avtomobildə niyə belə davranırlar?

Pişiklər adətən mühafizəkar heyvanlardır və yaşadıqları məkana güclü şəkildə bağlanırlar. Ətraf mühitin dəyişməsi onlar üçün ciddi stress yarada bilər. Pişik miyoldamaqla çox vaxt sahibinə yeni və ona təhlükəli görünən vəziyyətdən qorxduğunu göstərməyə çalışır.

Pişiyin avtomobildə səfərini necə rahatlaşdırmaq olar?

İlk növbədə pişiyi avtomobillə səyahətə həyatının ilk aylarından alışdırmaq məsləhətdir. Bu halda heyvan avtomobil səfərlərini adi hal kimi qəbul edə və gələcəkdə yolda daha sakit davrana bilər. Səfərdən əvvəl daşıma çantasını evdə görünən bir yerə qoymaq yaxşıdır.

Pişiyə onu araşdırmaq və alışmaq üçün vaxt vermək lazımdır. Daşıma çantasının içinə pişiyə tanış olan əşya da qoymaq olar. Məsələn, onun yatdığı örtük və ya sevimli oyuncağı uyğun seçimdir. Tanış qoxular heyvanın yeni şəraitə daha asan uyğunlaşmasına və qorxusunun azalmasına kömək edə bilər. Daşıma çantası çox kiçik olmamalıdır. Əks halda pişik özünü sıxılmış və narahat hiss edəcək.

Digər vacib məqam daşıma çantasının avtomobildə möhkəm bərkidilməsidir. Avtomobil hərəkət edərkən çantanın sağa-sola sürüşməsi heyvanın stressini daha da artıra bilər. Ümumiyyətlə, heyvanla səfər zamanı sürücülük tərzinə xüsusi diqqət yetirmək lazımdır.

Kəskin sürətlənmə, qəfil əyləcləmə və sükanın sərt hərəkətləri pişiyin vestibulyar sisteminə mənfi təsir göstərə və onun ürəyinin bulanmasına səbəb ola bilər. Pişiyi avtomobilin baqaj hissəsində aparmaq olmaz. Daşıma çantası ön və ya arxa oturacaqda yerləşdirilməli və təhlükəsizlik kəməri ilə etibarlı şəkildə bərkidilməlidir.

Baytarların fikrincə, səfərdən əvvəl pişiyə yemək verməmək daha məqsədəuyğundur. Bununla belə, su qəbulunu məhdudlaşdırmaq lazım deyil. Uzun səfərlər zamanı pişiyin istədiyi vaxt su içə bilməsi üçün tökülməyən xüsusi su qabı götürmək olar. Yol uzun olacaqsa, daşıma çantasının altına adi örtük əvəzinə nəm çəkən xüsusi bez və ya birdəfəlik altlıq sərmək daha uyğundur.

Pişiklə avtomobildə səfər edən sürücülər üçün 5 sadə məsləhət

Avtomobildəki güclü ətirləndiriciləri çıxarın və səfərdən əvvəl salonu havalandırın. Pişiyə yad olan kəskin qoxular onun stressini artıra bilər. Mümkün qədər az döngəsi və işıqforu olan marşrut seçin. Bu, heyvanın ürəkbulanma riskini azalda bilər. Səfər zamanı yüksək səslə musiqi dinləməyin.

Güclü səslər onsuz da narahat olan pişiyi daha çox qorxuda bilər. Əgər pişik avtomobil səfərlərini çox pis keçirirsə, baytarla məsləhətləşmək olar. Mütəxəssis lazım gələrsə, heyvan üçün uyğun sakitləşdirici vasitə tövsiyə edə bilər. Ən əsası isə pişiyi miyoldadığına görə danlamayın və ona qarşı səsinizi qaldırmayın. Heyvan bunu sizi əsəbiləşdirmək üçün deyil, qorxu və stress səbəbindən edir.

Heyvanlar heyvanlar aləmi pişiklər avtomobil