Bakıya 22 milyon avroya alınmış gəmi gətirilib

Azərbaycanın sifarişi ilə Xorvatiyada hazırlanmış gəmi-bərələrdən biri artıq Bakıya gətirilib. Lent.az-ın məlumatına görə, “Bərdə” adı verilmiş gəmi-bərə 54 vaqon tutumludur. Bundan başqa, gəmi ilə müxtəlif təyinatlı (yük, minik və s.) avtomobillərin də daşınması mümkündür. Bu gəmi Azərbaycana 22 milyon avroya başa gəlib.

Xəzər Dəniz Dövlət Gəmiçiliyi İdarəsinin mətbuat xidmətinin rəhbəri Vüqar Sadıqov Lent.az-a bildirib ki, Xorvatiyanın Pula tərsanəsində hazırlanmış “Balakən” gəmi-bərəsi də artıq hazırdır və yaxın vaxtlarda Bakıya gətiriləcək: “Hazırda gəmilərin sənədləşmə işləri həyata keçirilir. Bundan sonra gəmilərin təntənəli açılış mərasimi keçiriləcək və onlar istismara veriləcək. Beləliklə də Azərbaycanın gəmi-bərələrinin sayı 13-ə çatacaq. Bu gəmi bərələr əsasən Bakı-Aktau və Bakı-Türkmənbaşı istiqamətində hərəkət edəcək. Gəmilər son texnologiya ilə təmin olunub, tam kompüterləşdirilib”.

Qeyd edək ki, gəmilər Azərbaycana ümumilikdə 44 milyon avroya başa gəlib.

Nizam RZA