Dünyanı ərzaq qıtlığı gözləyir

BMT 40-45 il sonra gözlənilən ərzaq qıtlığı barədə dünya ölkələrinə xəbərdarlıq edir

Birləşmiş Millətlər Təşkilatı dünya ölkələrini öz əhalisinin ərzaq ehtiyatını genişləndirmək üçün təcili tədbirlər görməyə çağırıb. Çünki dünya əhalisi sürətlə artır və belə getsə, 40 ildən sonra insanların ərzağa oluna ehtiyacını ödəmək çox çətin olacaq.

Lent.az xarici mətbuata istinadən xəbər verir ki, BMT dünyanın artmaqda olan əhalisinin ərzaq təminatını ödəmək üçün yeni yollar axtardığını elan edib. Bu məqsədlə gələn ay İtaliyada beynəlxalq forumun keçiriləcəyi planlaşdırılıb. Romada təşkil olunacaq forum “2050-ci ildə dünyanı ərzaq qıtlığından necə qidalandırmalı?” devizi altında keçiriləcək.

BMT-nin Ərzaq və Kənd Təsərrüfatı Təşkilatının hesabatında deyilir ki, 2050-ci ildə dünya əhalisinin sayı 2,3 milyard nəfər artaraq 9,1 milyard nəfərə çatacaq. Bu isə o deməkdir ki, hazırkı ərzaq ehtiyatı insanların qidalanmasına kifayət etməyəcək. Ona görə də dünya dövlətləri gözlənilən təhlükəni qarşılamaq üçün indidən hazırlaşmalıdır. Əks təqdirdə dünyanı aclıq bürüyəcək.

Elxan SALAHOV