Pişiklər tənhalıqlarını sahiblərinə necə göstərirlər?

Mütəxəssislər pişiklərin davranışındakı hansı dəyişikliklərin tənhalıq hissindən xəbər verə biləcəyini açıqlayıblar.

Lent.az xəbər verir ki, bir çox insan pişiklərin müstəqil heyvan olduğunu və ünsiyyətə ehtiyac duymadığını düşünür. Lakin əslində ev heyvanları da tənhalıq, darıxma və stress yaşaya bilər. Bu hisslər zaman keçdikcə onların davranışında özünü göstərir. Mütəxəssislər ilk növbədə sağlamlıq problemlərini istisna etməyi və pişiyi baytara göstərməyi məsləhət görürlər. Çünki pişiklər çox vaxt ağrılarını gizlədir və davranış dəyişikliyi xəstəliyin əlaməti ola bilər. Əgər tibbi problem aşkar edilmirsə, qeyri-adi davranış ev heyvanının ünsiyyət və diqqət çatışmazlığı yaşadığını göstərə bilər.

Pişiklərin gün ərzində çox yatması normaldır. Lakin adi istirahətlə heyvanın həddindən artıq süstləşməsi arasında fərq var. Sağlam pişik əvvəlkindən daha çox yatır, ətrafda baş verənlərə az reaksiya verir və sevdiyi fəaliyyətlərə marağını itirirsə, bu, apatiya, darıxma və ya ünsiyyət çatışmazlığının əlaməti ola bilər. Mütəxəssislər davranışın hər iki formasına diqqət yetirməyi tövsiyə edirlər. Həm əvvəlki fəaliyyətlərə qəfil marağın itməsi, həm də gecələr evdə sürətlə qaçmaq kimi kəskin hiperaktivlik narahatlıq siqnalı ola bilər.

Darıxma və diqqət çatışmazlığı müxtəlif pişiklərdə fərqli şəkildə özünü göstərə bilər. Bəziləri özünə qapanır, digərləri isə əksinə, həddindən artıq aktivləşir. Pişiklərdə emosional problemlər bəzən iştahda da dəyişiklik yaradır. Bəzi pişiklər darıxma və ünsiyyət çatışmazlığını kompensasiya etmək üçün əvvəlkindən daha çox yeməyə başlayır. Digərləri isə əksinə, yeməkdən tamamilə imtina edə bilər. Hər iki vəziyyət təhlükəli ola bilər. Sağlamlıq problemi yoxdursa, iştahdakı bu dəyişikliklər heyvanın emosional vəziyyəti ilə əlaqəli ola bilər. Stress və tənhalıq hissi pişiyin özünə qulluq vərdişlərini də dəyişə bilər. Diqqət çatışmazlığı zamanı bəzi pişiklər özlərini yalamağı dayandırır, nəticədə tükləri parlaqlığını itirir və baxımsız görünür.

Digər hallarda isə heyvan müəyyən nahiyələri həddindən artıq yalamağa və hətta tüklərini yolmağa başlayır. Nəticədə tüksüz sahələr yarana bilər. Bu cür dəyişikliklər darıxma, stress və ünsiyyət çatışmazlığı ilə bağlı ola bilər. Əgər pişiyin tualeti təmizdirsə, qum və onun yeri dəyişdirilməyibsə, lakin heyvan qəfil tualetdən kənara ifraz etməyə başlayıbsa, səbəb güclü stress ola bilər. Bu, xüsusilə əvvəllər başqa heyvanlarla birlikdə yaşayan və daimi sosial ünsiyyətə öyrəşən pişiklərdə müşahidə edilə bilər. Pişiyin qəfil dağıdıcı davranışlar göstərməsi, məsələn, mebelləri cırması və ya əşyaları yerə salması da darıxma və kifayət qədər məşğuliyyətin olmamasına işarə edə bilər. Sahibini daim izləmək, yüksək səslə miyoldamaq və israrla diqqət tələb etmək də bəzən ünsiyyət çatışmazlığının əlaməti olur.

Bununla belə, problemi həll etmək üçün dərhal ikinci pişik götürmək məsləhət görülmür. Yeni heyvan diqqət çatışmazlığı problemini avtomatik aradan qaldırmaya bilər. Üstəlik, heyvanların fərqli xarakterə sahib olması stressi daha da artıra bilər. Pişikləri bir-biri ilə tədricən tanış etmək tövsiyə olunur. Onlar üçün ayrıca istirahət yerləri yaratmaq, sakitləşdirici feromonlardan istifadə etmək və dırnaqlarını qısa saxlamaq məsləhət görülür. Mütəxəssislər həmçinin bildirirlər ki, ev şəraitində yaşayan pişiyin həyatında müxtəliflik olmalıdır. Oyuncaqlar heyvanın vaxtını maraqlı keçirməsinə kömək edir, təhlükəsiz şəkildə balkona çıxmaq imkanı isə ona yeni təəssüratlar qazandıra bilər.

Heyvanlar pişiklər