Bu il ərzində Bakıda müxtəlif istiqamətləri əhatə edən 13 beynəlxalq sərgi və 2 forum təşkil olunub. Keçirilən tədbirlər qida sənayesi, kənd təsərrüfatı, səhiyyə, su təsərrüfatı, tikinti, nəqliyyat və digər sahələrdə Azərbaycan iqtisadiyyatının inkişafına, xüsusilə də qeyri-neft sektorunun genişlənməsinə töhfə verən mühüm platformalara çevrilib.
Əvvəlki illərdə olduğu kimi 2025-ci ildə keçirilən beynəlxalq sərgilər də ölkə rəhbərliyinin diqqət və qayğısı ilə əhatə olunub. Azərbaycan Respublikasının Prezidenti cənab İlham Əliyev 2025-ci ildə Bakıda təşkil edilən “Caspian Agro” və “InterFood Azerbaijan”, “Baku Energy Week” kimi iri miqyaslı tədbirləri ziyarət etmiş, iştirakçılarla görüşərək sərgilərin ekspozisiyası ilə tanış olmuşdur. Eləcə də, dövlət başçısı Xəzər İnşaat Həftəsinin iştirakçılarına ünvanladığı məktubda Qarabağın bərpası və yenidənqurulması prosesində bu tədbirin əhəmiyyətini vurğulamışdır.
Bütün bu sərgilər müvafiq dövlət qurumlarının və sahələr üzrə məsul strukturların dəstəyi ilə keçirilmişdir. Bu, dövlət səviyyəsində sərgi fəaliyyətinə göstərilən xüsusi diqqətin və qeyri-neft sektorunun inkişafına verilən önəmin göstəricisidir.
Yaxın günlərdə etdiyi çıxışların birində Azərbaycan Respublikasının Prezidenti cənab İlham Əliyev ölkə iqtisadiyyatının hərəkətverici qüvvəsi kimi qeyri-neft sektorunun rolunu xüsusi vurğulayıb.
“Bu gün iqtisadiyyatımızın aparıcı təkanverici qüvvəsi qeyri-neft sektordur. Bu, bizim ümumi iqtisadiyyatımızın əksəriyyətini təşkil edir” deyə, cənab prezident qeyd edib.
Məhz bu fikirlər 2025-ci ildə keçirilən sərgilərin əsas ideyasını və məqsədini müəyyənləşdirib. Ölkə başçısının bu sözləri cari ildə keçirilən sərgilərin mövzu və istiqamətlərində də geniş şəkildə öz əksini tapmışdır. Beynəlxalq sərgilər Azərbaycanın iqtisadiyyatında qeyri-neft sektorunun payının artırılmasına və bu sahədə beynəlxalq əməkdaşlığın güclənməsinə xidmət edib.
Bu tədbirlər sayəsində ölkəyə qeyri-neft sənayesini təmsil edən çoxsaylı xarici şirkətlər və investorlar cəlb olunub. Onlar sərgilər çərçivəsində öz innovasiyalarını, qabaqcıl texnologiyalarını və təcrübələrini təqdim edərək, yerli bazarda yeni tərəfdaşlıqların və istehsal müəssisələrinin yaranmasına təkan veriblər.
2025-ci ildə Bakıda keçirilən beynəlxalq sərgilər 70-dən çox ölkədən 45000-dən çox peşəkar ziyarətçini qəbul edib. Bu sərgilərdə iştirak və ziyarət məqsədilə, ümumilikdə 9000-ə yaxın xarici qonaq Azərbaycana səfər edib. Sərgilər 60-dan çox ölkədən 1200-dək şirkəti bir araya gətirib ki, onlardan 700-dən çoxu xarici eksponentlər olub. Baş tutmuş sərgilərdə müxtəlif ölkələr daha geniş tərkibdə iştirak edərək, ölkə pavilyonları ilə təmsil olunub. Bu il ümumilikdə 17 ölkə milli pavilyonlar şəkilində sərgiyə qatılıb. Keçirilən tədbirlər çərçivəsində 70-dək çox panel sessiyalarında 300-ə yaxın məruzəçi çıxış edib, 700-dən yuxarı işgüzar görüşlər (B2B) baş tutub. Bununla yanaşı, “Baku Energy Week” çərçivəsində 13 startap layihəsi iştirak etmişdir.
Bu göstəricilər sərgilərin həm iştirakçı, həm də coğrafi baxımdan əhəmiyyətni vurğulayır və beynəlxalq biznesin Azərbaycan bazarına olan artan marağını təsdiqləyir.
Bütün sərgilər dövlət qurumlarının dəstəyi ilə həyata keçirilib. Əldə olunan nəticələr Azərbaycanın regionun aparıcı sərgi mərkəzi kimi mövqeyinin möhkəmlənməsini, eləcə də ölkə iqtisadiyyatının, xüsusilə də qeyri-neft sektorunun inkişafına verilən mühüm dəstək və töhfəni əks etdirir.
2025-ci ilin sərgi mövsümü bir daha göstərdi ki, Bakıda keçirilən beynəlxalq sərgilər iqtisadiyyatın davamlı inkişafına, investisiya mühitinin genişlənməsinə və qeyri-neft sektorunun güclənməsinə təkan verərək, ölkənin ümumi iqtisadi artımına mühüm şəkildə dəstək olur.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
