Maştağalı avtoriteti "tac"landıran, Lənkəranskinin düşməni olan "qanuni oğru" TUTULDU

İnterpol xətti ilə axtarışda olan 54 yaşlı Georgi Sorokin Misirdən Özbəkistana ekstradisiya edilib. O, kriminal aləmdə “qanuni oğru” kimi tanınıb və “Jora Taşkentski”, eləcə də “Soroka” ləqəblərindən istifadə edib. Sorokin 1990-cı ildən etibarən MDB ölkələrində törətdiyi müxtəlif cinayətlərə görə dəfələrlə məsuliyyətə cəlb olunub.

Lent.az-ın xəbərinə görə, Özbəkistan Daxili İşlər Nazirliyinin mətbuat xidməti açıqlayıb ki, Georgi Sorokin Misirin Şarm əl-Şeyx şəhərindən Daşkəndə gətirilib. O, bir neçə il ərzində müxtəlif cinayətlərə görə axtarışda olub.

Özbəkistan əsilli və Rusiya vətəndaşı olan Sorokin son illər Dubayda yaşayıb. Onun üzərindən Rusiya vətəndaşına məxsus saxta pasport aşkarlanıb. Məlumata əsasən, o, uzun illər müxtəlif ölkələr arasında hərəkət etmək üçün həmin sənəddən istifadə edib.

İstintaq materiallarında qeyd olunub ki, Sorokin 2021-ci ildə Daşkənddə Cumayev, Curayev və digər şəxslərlə əlbir olaraq ümumi dəyəri 350 min ABŞ dolları olan iki evi ələ keçirib. O, ev sahibini hədələyib, döyüb və ailə üzvlərinə qarşı zorakılıq tətbiq edib. Daha sonra həmin evləri əlbir olduğu şəxslərin adına rəsmiləşdirib.

Sorokin barəsində Özbəkistan Cinayət Məcəlləsinin külli miqdarda hədə-qorxu ilə tələb etmə maddəsi üzrə cinayət işi açılıb. Bu əmələ görə 10 ildən 15 ilədək azadlıqdan məhrumetmə cəzası nəzərdə tutulub. O, Özbəkistan Daxili İşlər Nazirliyinin İnterpol vasitəsilə digər ölkələrin hüquq-mühafizə orqanları ilə əməkdaşlığı nəticəsində saxlanılıb.

Məlumata görə, Sorokin ilk cinayətini 1990-cı ildə, 18 yaşında törədib və həmin vaxt 7 il müddətinə azadlıqdan məhrum edilib. Sonrakı illərdə Özbəkistan, Qazaxıstan, Rusiya və digər MDB ölkələrində törətdiyi cinayətlərə görə dəfələrlə məhkum olunub. Onun törətdiyi cinayətlər arasında quldurluq, soyğunçuluq, hədə-qorxu ilə tələb etmə, qanunsuz silah və narkotik vasitə saxlama faktları yer alıb.

Qeyd edək ki, Georgi Sorokin bir zamanlar mərhum azərbaycanlı “qanuni oğru” Lotu Qulinin yaxın adamlarından olub. O, maştağalı Taleh Dağlıyevin “tac”landırılmasında da iştirak edib. Bundan əlavə 2016-cı ildə digər mərhum azərbaycanlı “qanuni oğru” Rövşən Lənkəranskinin adamları əks cəbhədə olan Sorokini döyərək, “oğru” olmadığını elan ediblər.