Aqata Kristidən evlilik barədə düşündürən söz: “Gənc ikən evlən, çünki...”

Dünya şöhrətli britaniyalı yazıçı Aqata Kristiyə aid edilən evliliklə bağlı maraqlı fikir yenidən müzakirə mövzusuna çevrilib.

Lent.az xarici mediaya istinadən xəbər verir ki, yazıçıya “Gənc ikən evlən, çünki yaşlandıqca daha müdrik olursan”, ifadəsi aid edilir.

Bu sözlər ilk baxışdan zarafat təsiri bağışlasa da, insanın yaşlandıqca sevgiyə və evliliyə münasibətinin dəyişməsinə işarə edir.

Belə ki, gənc yaşlarda münasibətlərdə hisslər və emosiyalar daha çox ön plana çıxa bilər. Zaman keçdikcə isə insanlar həyat yoldaşı seçimində uyğunluq, məsuliyyət, xarakter və gələcəkdə yarana biləcək problemlər barədə daha çox düşünürlər.

Bu baxımdan Aqata Kristiyə aid edilən ifadə gənclərə tez evlənmək tövsiyəsi kimi qiymətləndirilmir. Burada daha çox insanın həyat təcrübəsi qazandıqca evlilik kimi ciddi qərarlara daha ehtiyatla yanaşması ironik şəkildə ifadə olunur.

Maraqlıdır ki, evlilik və mürəkkəb insan münasibətləri Kristinin əsərlərində də mühüm yer tutur. Onun qəhrəmanları tez-tez yanlış insanlara güvənir, yaxınlarının gizlətdiyi həqiqətlərlə qarşılaşır və münasibətlərdə gözlənilməz hadisələr yaşayırlar.

Yazıçının “A Caribbean Mystery” romanında Miss Marple də evliliyin diqqətlə düşünülərək və tərəflərin bir-birinə uyğunluğu nəzərə alınaraq verilməli qərar olduğunu vurğulayır.