Finlər niyə komplimenti sevmirlər? - SƏBƏBLƏR

Bu paradoksal görünsə də, Finlandiyada səmimi bir kompliment insanda narahatlıq yarada bilər.

Lent.az bunun səbəblərini araşdırıb.

Məsələ ondadır ki, fin mədəniyyəti şəxsi sərhədlərə dərin hörmət üzərində qurulub. Komplimentlər burada fərdi zonaya müdaxilə kimi qəbul olunur, çünki onlar insanı kollektivdən ayırır — bu isə bərabərlik ideyasına ziddir.

Finlər təvazökarlığı (“vaatimattomuus”) yüksək dəyərləndirir və bir şəxsin diqqət mərkəzində olduğu situasiyalardan qaçmağa çalışırlar.

Məsələn, işlə bağlı təriflər tez-tez utanma ilə qarşılanır: “Bu, sadəcə vəzifəmdir” — deyə cavab verirlər və söhbəti neytral mövzuya yönəldirlər.

Bu davranışın kökləri “sisu” anlayışına dayanır — çətinlikləri gözə soxmadan dözümlü olmaq və mübarizə aparmaq bacarığına. Finlər hesab edirlər ki, işini yaxşı yerinə yetirmək tərifəlayiq bir şey yox, normadır.

Hətta ailə daxilində belə komplimentlər nadir hallarda səslənir: “Sən əla yemək bişirirsən” əvəzinə “Bu gün balıq şorbası yaxşı alınıb” deyilir. Bu soyuqluq yox, insana özünü narahat hiss etdirməmək üçün balans saxlamaq üsuludur.

Finlandiyada ictimai tərif manipulyasiya və ya qarşılıq gözləntiləri ilə əlaqələndirilə bilər.

Xaricilər tez-tez “buzları əridəcəyini” düşünərək komplimentlərə əl atırlar, amma bu, əks təsir doğura bilər.

Biznes görüşündə “Sizin təqdimatınız dahiyanədir” kimi ifadələr sevinc yox, şübhə oyada bilər. Ən yaxşısı neytral ifadələr işlətməkdir: “Məlumatlar aydın şəkildə təqdim olunmuşdu”.

Şəxsi ünsiyyətdə isə ümumi atmosferi tərifləmək daha uyğundur: “Eviniz çox rahatdır” demək “Pərdələriniz çox gözəldir” deməkdən daha uyğun sayılır.

Bu yanaşma fərdi yox, kollektiv dəyərlərə üstünlük verən mədəniyyətə hörmətin ifadəsidir.