Qoltuqaltı tər qoxusundan xilas olmağın sadə üsulu

Mağazalarda çoxlu sayda dezodorant və antiperspirant satılsa da, bir çox insan daha sadə, təhlükəsiz və əlçatan alternativlər axtarır.

Lent.az xarici mediaya istinadən bildirir ki, mütəxəssislərin sözlərinə görə, adi çörək sodası tər qoxusunu azaltmağa kömək edə bilər.

Soda tər qoxusunu niyə azaldır?

Əslində insan təri demək olar ki, qoxusuz olur. Kəskin xoşagəlməz qoxu dərinin səthində yaşayan bakteriyaların tərin tərkibindəki maddələri parçalamağa başlaması nəticəsində yaranır. Mütəxəssislərin sözlərinə görə, çörək sodası qoxunu sadəcə maskalamır, onun yaranmasına şərait yaradan mühiti dəyişir.

Soda dərinin pH səviyyəsini qismən qələvi istiqamətə dəyişərək bakteriyaların çoxalmasını çətinləşdirir. Bundan başqa, nazik soda təbəqəsi artıq nəmi müəyyən qədər özünə çəkərək dərinin daha uzun müddət quru qalmasına kömək edir. Həmçinin bu üsul alüminium duzları tərkibli bəzi antiperspirantlardan fərqli olaraq tərləmə prosesini tam dayandırmır.

Məhlul necə hazırlanır?

Məhlulu hazırlamaq üçün bir stəkan ilıq suya bir xörək qaşığı çörək sodası əlavə edilir və tam həll olana qədər qarışdırılır. Daha sonra pambıq disk və ya pambıq çubuq məhlula batırılır, artıq maye sıxıldıqdan sonra duşdan sonra təmiz və quru qoltuqaltı nahiyəyə çəkilir. Bu üsul bir neçə saat ərzində təravət hissi yarada bilər. İsti havalarda isə ehtiyac yaranarsa, gün ərzində yenidən tətbiq etmək mümkündür.

Kimlər üçün uyğun olmaya bilər?

Bu üsul ucuz, əlçatan və ətirsiz olduğu üçün xüsusilə ofisdə, tibb müəssisələrində və güclü ətirlərin arzuolunmadığı mühitlərdə işləyən insanlar üçün əlverişli hesab edilir. Lakin həssas və ya quru dəriyə sahib insanlarda soda qıcıqlanma və qaşınmaya səbəb ola bilər. Buna görə ilk istifadədən əvvəl məhlulu dərinin kiçik bir hissəsində sınaqdan keçirmək tövsiyə olunur. Həmçinin nəzərə almaq lazımdır ki, çox isti hava şəraitində və ya intensiv fiziki məşq zamanı yalnız bu üsul bütün gün ərzində kifayət qədər təsir göstərməyə bilər.