Azərbaycanda I Universitetlərarası teatr festivalı keçiriləcək

Festival Azərbaycan Dillər Universitetində baş tutacaq

Azərbaycan Dillər Universitetində (ADU) mayın 15-də ölkədə ilk dəfə olaraq Universitetlərarası Teatr festivalı start götürəcək. Universitetin mətbuat xidmətindən Lent.az-a verilən məlumata görə, layihənin koordinatoru ADU-nun Teatr klubunun rəhbəri Rasim Aşındır. “Biz həvəskarıq” adı altında keçiriləcək festival Azərbaycan Dillər Universitetinin 3 saylı tədris binasında təşkil olunacaq. Festival gənclərdə teatra maraq oyatmaq məqsədini daşıyır.
Teatr festivalında Azərbaycan Dillər Universitetinin Teatr klubu, Azərbaycan Dövlət Mədəniyyət və İncəsənət Universitetinin “Poeziya” və “Performans” teatr klubları, Bakı Slavyan Universitetinin “Tələbə” Teleradio Studiyası və Azərbaycan Qafqaz Universitetinin Teatr klubunun üzvlərinin hazırladıqları tamaşaları nümayiş etdirəcəklər.
Festivalda mayın 15-i (saat 13.30-dan 17.30-dək) Azərbaycan Qafqaz Universiteti “Xurşudbanu Natəvan”, Azərbaycan Dövlət Mədəniyyət və İncəsənət Universitetinin “Poeziya” Teatr klubu “Eşq-i süqut”, “Performans” Teatr klubu isə “Adəmin oyunları”, ayın 16-sı (saat 13.30-da) Azərbaycan Dillər Universitetinin Teatr klubunun üzvləri “Özümüz” tamaşası və Bakı Slavyan Universitetinin “Tələbə” Teleradio Studiyasının “Tamah” adlı tamaşası (saat 15.30-da) göstəriləcək.
Xatırladaq ki, ADU-nun Teatr klubu aprelin 23-dən 30-dək Antalyanın Akdeniz və İstanbulun Fatih Universitetlərində Beynəlxalq Teatr festivalında iştirak ediblər.

Pərvin ABBASOV