Pisliyin hər küncdə gizləndiyi bir dünya sizi HBO Max platformasında gözləyir. Burada illərlə cəmiyyəti gərginlikdə saxlayan gerçək hadisələrə əsaslanan ən təsirli cinayət sənədli filmləri toplanıb. Bu sənət əsərləri dərin araşdırmalar, səmimi ifadələr və dinamik hekayə quruluşu ilə seçilir, janrın ən tələbkar izləyicilərini belə heyrətləndirir.
Lent.az izləməyə dəyər 10 unudulmaz cinayət sənədli filmi təqdim edir.
Milyarderin sirləri (The Jinx, 2015)
“Emmi” və “Peabody” mükafatlarına layiq görülmüş bu sənədli serial rejissor Endryu Careykin 10 ildən çox davam edən araşdırmasının nəticəsidir. O, otel imperiyasının varisi Robert Dörstün qaranlıq sirrlərini ifşa edir. Film onun üç rezonans doğuran cinayətə — arvadı Ketrin Makkormakın (1982) itkin düşməsi, yaxın dostu Syuzan Bermanın (2000) qətli və qonşusu Morris Blekin (2001) ölümünə — potensial əlaqəsini araşdırır. Tənqidçilər bu işi “detektiv janrının zirvəsi” adlandırıblar.
Ölü ana (Mommy Dead and Dearest, 2017)
Rejissor Erin Li Karter anası Klodin “Di Di” Blaşarı qətlə yetirən qızı Cipsi Rouzun hekayəsini araşdırır. Film illərlə davam edən psixoloji və emosional zorakılığı, ananın Mюнxauzen sindromundan əziyyət çəkərək qızına xəstəliklər “uydurmasını” və onu zəhərləməsini açıq şəkildə göstərir. Bu sarsıdıcı film ədalət və mənəviyyat anlayışlarına yenidən baxmağa vadar edir.
Alabamalı qərar (Alabama Snake, 2020)
Bu cənub gotik üslubunda çəkilmiş qorxunc film zəhərli ilanlarla adam öldürmə cəhdi haqqında danışır. Hadisə pentekostal keşiş Glenn Sammerfordun arvadı Darlini öldürmək üçün onun əlini zəhərli ilanların qəfəsinə salması ilə bağlıdır. Rejissor Teo Lav dini fanatizm, günah və dəhşət arasındakı incə xətti ustalıqla göstərir.
Bütün gözəllik və qanlılıq (All the Beauty and the Bloodshed, 2022)
Bu film məşhur fotoqraf Nən Qoldinin həyatına və sənətinə həsr olunub. O, özünün və dostlarının həyatındakı yaxın anları sənədləşdirir, QİÇS böhranı, ailədaxili zorakılıq və opioid epidemiyası kimi mövzulara toxunur. Qoldin Sakler ailəsinin opioid böhranındakı rolunu ifşa edir. Tənqidçilər filmi ilin ən güclü sənədli əsərlərindən biri adlandırıblar.
Qarda bədən: Karen Rid məhkəməsi (Body in the Snow: The Killing of John O'Keefe, 2025)
Bostonu sarsıdan bu beşseriyalı sənədli film polis zabiti Con O’Kifin ölüm işi ətrafında cərəyan edir. Onun sevgilisi Karen Rid avtomobil ilə vurmaqda ittiham olunur, lakin o, özünü günahsız sayır və bəzi sübutlar korrupsiyaya bulaşmış polis əməkdaşlarının “qurğu”sunu göstərir. Serial 2025-ci ildə baş tutan məhkəmə ilə şəhəri iki yerə bölən sarsıdıcı hadisələri əks etdirir.
Fridmanların tutulması (Capturing the Friedmans, 2003)
“Oskar”a namizəd olmuş və “Sundance” festivalında Qran-pri qazanmış film rejissor Endryu Careykinin işi olub. O, Arnold Fridman və onun oğlu Cessi Fridmanın uşaqlara qarşı cinsi zorakılıq ittihamı ilə bağlı işini araşdırır. Arxiv görüntüləri və müsahibələr vasitəsilə film bu işin arxasındakı “seksual isteriya” anlayışını ifşa edir və cəmiyyəti stereotiplərini sorğulamağa məcbur edir.
Əsrin cinayəti (The Crime of the Century, 2021)
“Emmi” və “Oskar” mükafatçısı rejissor Aleks Gibni ABŞ-da opioid böhranına səbəb olan farmasevtik şirkətləri və korrupsiyalaşmış siyasətçiləri ifşa edir. İki hissədən ibarət bu sənədli film korporativ acgözlüyün və siyasi laqeydliyin ölümcül nəticələrini dəqiqliklə göstərir.
Çayda qız: Bağışlanmanın qiyməti (A Girl in the River: The Price of Forgiveness, 2015)
Pakistan hər il “şərəf qətlləri” səbəbindən minlərlə qadının ölümünə şahid olur. “Oskar” mükafatlı bu qısametrajlı film atasının və əmisi tərəfindən öldürülmək istənilən, lakin möcüzəvi şəkildə sağ qalan 19 yaşlı qızın hekayəsini danışır. Rejissor Şarmin Obaid-Çinoyun bu filmi real dəyişikliklərə səbəb olub — Pakistanın baş naziri qanunlarda islahat aparmağa söz verib.
Mən D.B. Kuperəm (The Mystery of D.B. Cooper, 2020)
1971-ci ildə Boeing 747 təyyarəsini qaçıraraq 200 min dollar tələb edib paraşütlə qeybə çəkilən sirli dələduzun hekayəsi hələ də dünyanı çaşdırır. Film D.B. Kuperin kimliyinə dair onilliklərdir davam edən araşdırmaları əhatə edir. İstintaqçılar müxtəlif versiyalar irəli sürür, bəziləri isə onun şəxsiyyətini artıq müəyyən etdiyini iddia edir. Bu sənədli film yalnız bir qaçırılma işi deyil — insanlığın miflərə və bilinməyənə olan cazibəsini incə yumorla təhlil edir.
İxtiraçı: Silikon vadisində qan istəyi (The Inventor: Out for Blood in Silicon Valley, 2019)
Film Elizabet Holms və onun uğursuz “Theranos” startapı haqqında dramatik hekayəni danışır. 19 yaşında Stenfordu tərk edən Holms tibb texnologiyasında inqilab yaratmaq istəsə də, onun “yalnız bir damcı qandan diaqnoz” iddiası saxtakarlıq kimi ifşa edilir. Wall Street Journal jurnalistlərinin araşdırması nəticəsində yalanlar üzə çıxır. Film korporativ acgözlüyün və saxta şöhrətin təhlükəli nəticələrinə dair xəbərdarlıq kimi qiymətləndirilir.
Əgər axşamınızı gərgin və sirli atmosferdə keçirmək, içərinizdəki detektivi oyandırmaq istəyirsinizsə, bu siyahını yadda saxlayın. Bu 5 ən gərgin və sarsıdıcı sənədli film və seriallar sizi həm narahat edəcək, həm də uzun müddət unutmayacağınız təəssürat buraxacaq. Hazır olun — rahatlıq yox, amma həyəcan və unudulmaz hisslər sizi gözləyir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
