Yerdə COVID CƏHƏNNƏMİ: Bu ölkədə cəsədlər küçələrdə yandırılır

Hindistanda koronavirusla bağlı vəziyyət kəskin şəkildə pisləşib.

Lent.az xarici mediaya istinadla bildirir ki, ölkənin Səhiyyə Nazirliyinin yaydığı məlumata görə, dərman çatışmazlığı yaranıb, xəstəxana və meyitxanalarda yer yoxdur.

Hazırda, hətta ölkənin krematoriyaları (ölən insanların yandırılması üçün nəzərdə tutulan sobalar) da imkanlarının həddini aşmış vəziyyətdə işləyir.

İnfeksiyanın sürətlə yayılması və pandemiyanın yeni dalğasına effektli hazırlaşmamaq ölüm sayının kəskin artmasına səbəb olub.

Hindistanda ikinci dalğa

Pandemiyanın ikinci dalğası ilə bağlı yerli hakimiyyət martın ortalarına məlumat yayıb. O, elə güclü olub ki, təkcə xəstəxanalar və intensiv terapiya şöbələri yox, hətta meyitxanalar və krematoriyalarda da kəskin yer qıtlığı yaranıb.
Həkimlər dərmanların, oksigen və ventilyasiya aparatlarının çatışmadığını bəyan edirlər.

Yüksək ölüm nisbəti və krematoriyaların yükünün sayəsində meyitxanalarda ölülərin cəsədlərinin yığılması müşahidə olunur. Yeni cəsəd qəbulu mümkün deyil.

Qudjarat ştatında meyitlərin yandırılması üçün nəzərdə tutulan sobalar sutka boyu işləməli olur. Bu səbəbdən sobaların metal hissələri belə əriməyə başlayıb.

Uttar-Pradeş ştatında ikinci dalğa başlayandan belə sobaların sayı 5 dəfə artıb.

Buna görə Hindistanın bəzi şəhərlərində COVID-19-dan ölənlərin cəsədləri birbaşa küçədə yandırılır.