Azərbaycan prezidenti müxtəlif ölkələrlə imzalanmış ikitərəfli sənədləri təsdiqləyib

Azərbaycan prezidenti müxtəlif ölkələrlə imzalanmış ikitərəfli sənədlərin təsdiq edilməsi haqqında fərmanlar imzalayıb.

APA-nın məlumatına görə, fərmanlara əsasən, Azərbaycan İqtisadi İnkişaf Nazirliyi ilə Argentina Elm, Texnologiya və Səmərəli İnnovasiya Nazirliyi arasında elmi, texnoloji tədqiqat və innovasiya sahələrində anlaşma memorandumu, Azərbaycan və Tacikistan hökumətləri arasında gənclərlə iş və idman sahəsində əməkdaşlıq haqqında saziş, iki ölkənin xarici siyasət idarələri arasında əməkdaşlıq haqqında protokol, Azərbaycan və Tacikistanın Kənd Təsərrüfatı nazirlikləri arasında kənd təsərrüfatı sahəsində əməkdaşlıq haqqında saziş, Azərbaycan Ailə, Qadın və Uşaq Problemləri üzrə Dövlət Komitəsi və Latviya Rifah Nazirliyi arasında anlaşma memorandumu, Azərbaycan və Belarusun ədliyyə nazirlikləri arasında məhkəmə ekspertizası sahəsində əməkdaşlıq haqqında saziş, iki ölkənin səhiyyə nazirlikləri arasında dərman vasitələrinin keyfiyyətinə nəzarət və onların qeydiyyatdan keçirilməsi sahəsində əməkdaşlıq haqqında saziş, Azərbaycan Kənd Təsərrüfatı Nazirliyi və Latviya Respublikasının Kənd Təsərrüfatı Nazirliyi arasında əməkdaşlıq haqqında Anlaşma Memorandumu, Azərbaycan İqtisadi İnkişaf Nazirliyi və Çin Xalq Respublikasının Kommersiya Nazirliyi arasında əməkdaşlıq haqqında Memorandum, İqtisadi İnkişaf Nazirliyi və Çin Sincan-Uyğur Muxtar Rayonu hökuməti arasında Azərbaycan-Çin ticarət-iqtisadi əməkdaşlığı üzrə ticarət-iqtisadi əməkdaşlıq üzrə İşçi Qrupunun yaradılması haqqında Protokol
təsdiqlənib.

Bundan başqa prezident Sankt-Peterburq şəhərində Azərbaycan hökuməti tərəfindən qeyd-şərtlə imzalanmış “Məhsul və xidmətlərin keyfiyyəti sahəsində nailiyyətlərə görə Müstəqil Dövlətlər Birliyinin Mükafatına təqdimat müsabiqəsi barədə Əsasnamə”də dəyişikliklər edilməsi haqqında Qərar”ı da təsdiq edib.