İctimai Palata razılaşdırılmamış aksiyaya hazırlaşır

Müsavat Partiyası sədrinin müavini Gülağa Aslanlı APA-ya deyib ki, aksiya öncəsi partiyanın Sabirabad və Bakının Nizami rayon təşkilatlarının sədrləri Azər İsmayıl və Azad Əlili saxlanılaraq yaşadıqları ərazi üzrə polis şöbəsinə aparılıblar. Müsavat Partiyasının Sumqayıt şəhər təşkilatının fəallarına xəbərdarlıq edilib.

AXCP sədrinin köməkçisi Faiq Əmirovun APA-ya verdiyi məlumata görə, partiyanın bir neçə fəalına, həmçinin AXCP-nin Sabirabad rayon təşkilatının sədri Novruz Quluzadə və müavini Samir İbrahim polis şöbəsində xəbərdarlıq edilib. AXCP Rəyasət Heyətinin üzvü Eldar Hüseynov, Sumqayıt rayon şöbəsinin sədri Mahir Qarayev isə bu gün saat 16.00-da Fransada yaşayan Elnur Məcidli haqqında başlanmış cinayət işi üzrə ifadə verməyə çağırılıblar.

Klassik Xalq Cəbhəsi Partiyasının (KXCP) təşkilat şöbəsinin müdiri Xəzər Teyyublu isə APA-ya bildirib ki, KXCP-nin Sumqayıt, Masallı, Qazax təşkilatlarının rəhbərlərinə də mitinqə getməməklə bağlı yerli polis bölmələri tərəfindən xəbərdarlıq olunub.

AMİP-in mətbuat katibi Əli Orucov isə APA-ya deyib ki, bu saata qədər aprelin 17-də keçiriləcək aksiya ilə bağlı təmsil etdiyi partiya üzvlərindən saxlanılan yoxdur.

İP-dən o da qeyd olunub ki, qurumda təmsil olunan partiya rəhbərlərinin bu gün keçiriləcək aksiyada iştirakları ilə bağlı hələlik hansısa məlumat yoxdur.

Bakı Şəhər Baş Polis idarəsi isə Bakı şəhər İcra Hakimiyyəti ilə razılaşdırılmamış aksiyanın qarşısının alınacağını bildirib.